Elordada 25-40 jas aralyǵyndaǵy júrgizýshiler jol erejesin jıi buzady

ASTANA. QazAqparat – Elordada 25-40 jas aralyǵyndaǵy júrgizýshiler jol erejesin jıi buzady. Bul týraly BAQ ókilderiniń qatysýymen ótken brıfıngide QazAqparat tilshisiniń saýalyna jaýap bergen Astana qalalyq Ákimshilik polıtsııa basqarmasynyń bólim basshysy Baýyrjan Toǵjumanov málim etti.

«Biz jol-kólik oqıǵalaryn jasaǵan, ereje buzǵan adamdardyń jas ereksheligine taldaý jasaımyz. Elordada 25-40 jas aralyǵyndaǵy júrgizýshiler men jaıaý júrginshiler jol erejesin kóp buzady. Ereje buzý saldary aýyr zardaptarǵa ákep soǵyp jatady. Onyń ishinde erler de, áıelder de bar», - dep jaýap berdi Baýyrjan Toǵjumanov.

Sonymen birge ol jyl basynan beri elorda aýmaǵynda 110 jol-kólik oqıǵasy tirkelip, saldarynan 6 adam qaza tapqanyn aıtty. Buǵan qosa, 123 adam ártúrli dene jaraqatyn alǵan.

Baýyrjan Toǵjumanovtyń dereginshe, bıyl Astanada jol erejesin saqtamaýdyń 94 044 faktisi anyqtalyp, 729 mln teńgeden astam somaǵa aıyppul salynǵan.

Málim bolǵandaı, qalada árbir besinshi jol apaty jaıaý júrginshiniń kinásinen bolady.

Bas qalada 27 myń júrgizýshiniń jalpy somasy 1 mlrd teńgeden astam aıyppul bereshegi bar.

Ákimshilik polıtsııa basqarmasynyń ókili, sondaı-aq Máńgilik el dańǵylyndaǵy kólik keptelisi máselesi qashan sheshiletinin aıtty.