Elordada 205 ınvestıtsııalyq joba júzege asyrylmaq

ASTANA. QazAqparat – Osy jyldyń 11 aıynda elordada ónerkásip óndirisiniń kólemi 1,6 trln teńgege jetti. Bul týraly elorda ákiminiń orynbasary Erlan Bekmyrzaev aıtty, dep habarlaıdy QazAqparat tilshisi.

«Búginde Astana Invest qorjynynda 33 myń jumys ornyn ashýdy kózdeıtin, jalpy somasy 2,6 trln teńge bolatyn 270 ınvestıtsııalyq joba bar. Onyń ishinde 65 joba iske qosyldy. Investıtsııa somasy – 357,4 mlrd teńge. 7,2 myń jumys orny quryldy. Quny 2,3 trln teńge bolatyn 205 joba júzege asyrylý satysynda tur. 26,1 myń jumys orny ashylady dep kútiledi», - dedi ol ákimdiktiń baspasóz qyzmeti alańynda ótken brıfıngte.

Qala ákimi orynbasarynyń dereginshe, bilim salasynda 134 mlrd teńgege 48 joba, qurylys ındýstrııasynda 113 mlrd teńgege 43 joba, mashına jasaý salasynda 127 mlrd teńgege 34 joba, logıstıkada 189 mlrd teńgege 43 joba, jeńil jáne hımııa ónerkásibinde 49,3 mlrd teńgege 31 joba, sport salasynda 15 mlrd teńgege 17 joba, medıtsınada 419 mlrd teńgege 14 joba iske asyrylatyn bolady.

«Memleket basshysynyń tapsyrmasyna sáıkes, ónerkásip sektoryn damytýǵa aıryqsha nazar aýdaramyz. Osy jyldyń 11 aıynda elordada ónerkásip óndirisiniń kólemi 1,6 trln teńgeni qurap, óńdeý ónerkási óndirisi 1,5 trln teńgege jetti. Óńdeý ónerkásibine 25,1 mlrd teńge ınvestıtsııa salyndy», - dedi Erlan Bekmyrzaev.