Elordada 2026 jyly taǵy 13 mektep salynady

ASTANA. KAZINFORM – Astana qalasynyń ákimi Jeńis Qasymbek Instagram paraqshasynda bıyl ashylatyn mektepter týraly jazdy, dep habarlaıdy elorda ákimdiginiń resmı saıty.

– Bilim berý nysandaryn salý boıynsha júıeli jumys júrgizilip jatyr. Sońǵy jyldary elordada 109 myń oqýshy ornyna eseptelgen (eki aýysymdy) 44 mektep salynyp, paıdalanýǵa berildi. Onyń ishinde 23 mektep Memleket basshysynyń «Keleshek mektepteri» ulttyq jobasy aıasynda boı kóterdi. Aldyńǵy oqý jylynda rekordty kólemde mektep salyndy: 64 myń oqýshy ornyna arnap 25 bilim berý mekemesi paıdalanýǵa berilgen, - dedi qala ákimi. 

Jeńis Qasymbektiń aıtýynsha, bıylǵy oqý jylynyń basynan bastap taǵy 9 mektep ashylǵan. 2026 jyly taǵy 13 mektep salý josparlanyp otyr.

– Birqatar bilim berý nysanynyń qurylysymen tanystym. Sol sııaqty mektepterdi salý barysynda aýmaǵyn abattandyrý máselesine erekshe kóńil bólinedi. 2027 jylǵa arnap daıyndyq jumysyn qatar júrgizip jatyrmyz: jalpy syıymdylyǵy 40 myń oqýshyny (eki aýysymdy) qamtıtyn 16 memlekettik mektep boıynsha jobalaý jáne qala qurylysy qujattamasyn ázirleý qolǵa alyndy. Budan bólek, 10 myń oqýshyǵa arnalǵan 10 jekemenshik mekteptiń qujattary daıyndalyp jatyr. Bas josparǵa sáıkes, 2035 jylǵa deıin qalada 138 jańa mektep salý kózdelip otyr, - dep jazdy aımaq basshysy.

Eske salsaq, osyǵan deıin Qazaqstanda byltyr 162 jańa mektep salynǵanyn jazǵanbyz.