Elordada 200 úlesker uzaq kútken páter kiltin aldy
NUR-SULTAN. QazAqparat - Elordada qurylysy uzaqqa sozylǵan «Altyn Shar» turǵyn úı kesheniniń №1 blogyndaǵy jumystar aıaqtalyp, 200 otbasyǵa páter kilti tabystaldy. Bul jaıynda Nur-Sultan qalasynyń ákimi Altaı Kólginov Instagram paraqshasynda jazdy, dep habarlaıdy QazAqparat tilshisi.
«Jumys kúni aıaqtalǵan soń úleskerlermen kezdestim. «Altyn shardy» alǵash kórgen kezde qurylysy múlde toqtap turǵan bolatyn. «GLB» úı qurylysy kombınatynyń qurylysshylar men kredıtorlar aldynda mıllıondaǵan qaryzdary boldy. Kóppáterli turǵyn úı kesheni úsh bloktan turady. Mundaǵy jumystar qaıta jańǵyrtyldy. Memleket tarapynan qurylys kombınatynyń jumysynyń qaıta jandanýyna kómek kórsetildi. Úıdiń birinshi blogynyń qurylysy aıaqtalyp, paıdalanýǵa berildi. «Altyn Shar« (blok №1) úleskerlerine kiltter berilip, qujattar rásimdele bastady. Bul – shamamen 200 otbasy. Otbasylardyń bir bóligi kópten kútken baspanaǵa kirip úlgerdi», - dedi qala basshysy.
Onyń atap ótýinshe, osy jyldyń sońyna deı̆in atalǵan turǵyn úıdiń ekinshi blogyn aıaqtaý josparlanǵan. Sol kezde taǵy 200 úleskerdiń máselesi sheshiledi.
«Al úshinshi bloktaǵy jumystardy kúsheı̆týdi tapsyrdym. Ol jerde 218 otbasy páterin kútip otyr. Úıge ýaqytsha kirme joldar saldyq, qurylys jumystary aıaqtalǵannan keıin aýmaqty abattandyrýǵa kirisemiz. Sonymen birge qurylys kombınaty «Baǵystandy« aıaqtaý men áleýmettik qoljetimdi turǵyn úı qurylysyna jumyldyrylǵan. Úı qurylysy kombınatynyń jumysyn qaıta jańǵyrtý sapaǵa nuqsan keltirmeı, úılerdiń az ýaqytta salyp shyǵýǵa jáne sharshy metrdiń ózindik qunyn tómendetýge múmkindik beredi», - dep jazdy Altaı Kólginov.
