Elordada 200 myńǵa jýyq oqýshy jazǵy lagermen qamtyldy

ASTANA. KAZINFORM – Elordada balalardyń jazǵy demalysyn tıimdi ári mazmundy uıymdastyrý baǵytynda aýqymdy jumystar júrgizilip jatyr. Úsh aıǵa sozylatyn jazǵy maýsymnyń ekinshi aıy aıaqtalýǵa jaqyn. Osy ýaqyt aralyǵynda elordada 200 myńǵa jýyq oqýshy jazǵy lagerlermen qamtyldy.

Elorda ákimdigi resmı saıtynyń málimetinshe, balalar demalysynyń sapasyn arttyrý maqsatynda qala boıynsha ártúrli baǵyttaǵy lagerler uıymdastyrylǵan. 

Olar:

• 92 mektep janyndaǵy lager;

• 192 beıindi lager;

• 10 taqyryptyq joba aıasyndaǵy lager;

• 13 qosymsha bilim berý uıymy bazasyndaǵy kúndizgi lagerler.

Qazirgi tańda úshinshi aýysym jumysyn bastady. Bul kezeńde de balalardyń bos ýaqytyn tıimdi ótkizýine, shyǵarmashylyq qabiletin damytýyna, jańa dostar tabýyna jáne densaýlyqtaryn nyǵaıtýyna baǵyttalǵan tanymdyq, sporttyq jáne mádenı sharalar keń kólemde uıymdastyrylyp jatyr. 

Bıylǵy jazǵy maýsymnyń aıryqsha jańalyǵy – Aqmola oblysy, Aqkól aýdanynda ornalasqan «Barap» balalar sporttyq-saýyqtyrý ortalyǵynyń ashylýy. Ortalyq jaz boıy 1 400-den astam bala qabyldap, olardyń belsendi demalysyna múmkindik beredi. 

Sonymen qatar 4 myńnan astam oqýshy qala syrtyndaǵy ózge de saýyqtyrý lagerlerinde tynyǵyp jatyr. Bul baǵyttaǵy jumystar jergilikti bıýdjet esebinen qarjylandyrylyp, balalarǵa tolyqqandy demalys jaǵdaılary jasalǵan.

Buǵan deıin Býrabaıda shetelde turatyn qazaq balalaryna arnalǵan etnolager ashylǵanyn jazǵan edik.