Elordada 200-ge jýyq samokat paıdalanýshysy jaýapkershilikke tartyldy
ASTANA. KAZINFORM — Elordada elektrosamokattardy júrgizý qaǵıdalaryn saqtaý boıynsha baqylaý kúsheıtildi.
Astanada aýa raıynyń jylynýyna jáne elektrosamokat paıdalanýshylar sanynyń edáýir artýyna baılanysty elordalyq polıtseıler quqyq buzýshylyqtardyń aldyn alý jáne jol qozǵalysyna qatysýshylardyń qaýipsizdigin qamtamasyz etý maqsatynda profılaktıkalyq jáne reıdtik is-sharalardy kúsheıtti.
Polıtsııa qyzmetkerleri azamattarǵa jol qozǵalysy qaǵıdalaryn qatań saqtaý qajettiligi týraly turaqty túrde túsindirý jumysyn júrgizýde. Ásirese, elektrosamokattardy qaýipsiz paıdalaný, qorǵanys quraldaryn qoldaný, sondaı-aq paıdalanýshylardyń ózderine de, jaıaý júrginshiler men júrgizýshilerge de qaýip tóndiretin quqyq buzýshylyqtarǵa jol bermeý máselelerine erekshe nazar aýdarylýda.
Reıdtik is-sharalar barysynda patrýldik polıtsııa qyzmetkerleri elektrosamokattardy paıdalaný jáne ornalastyrý qaǵıdalaryn buzý derekterin anyqtaýda. Aǵymdaǵy kezeńde 200-ge jýyq samokat paıdalanýshysy ákimshilik jaýaptylyqqa tartyldy.
Jol qozǵalysynyń barlyq qatysýshylarynyń qaýipsizdigi máselesine erekshe kóńil bólinýde. Qozǵalys qaǵıdalaryn buzý, sondaı-aq elektrosamokattardy retsiz qoıý jáne belgilenbegen oryndarǵa qaldyrý jaıaý júrginshiler úshin qaýipti jaǵdaı týǵyzady, kólik qozǵalysyn qıyndatady jáne azamattardyń, sonyń ishinde múmkindigi shekteýli adamdardyń, balalar arbasymen júrgen ata-analardyń qaýipsiz qozǵalýyna kedergi keltiredi.
Reıdter barysynda polıtseıler erejeni buzyp ornalastyrylǵan elektrosamokattardy kommýnaldyq turaqtarǵa evakýatsııalaýda. Búgingi kúni ondaı turaqtarǵa 170-ten astam elektrosamokat jetkizildi. Aldaǵy ýaqytta sherıngtik kompanııalarǵa jeke mobıldilik quraldaryn ornalastyrý men paıdalanýdy durys uıymdastyrmaǵany úshin ákimshilik yqpal etý sharalary qoldanylatyn bolady.
Elorda polıtsııa departamenti qala turǵyndary men qonaqtaryn elektrosamokattardy paıdalaný kezinde Jol qozǵalysy qaǵıdalaryn qatań saqtaýǵa shaqyrady. Quqyq buzýshylyqtardyń aldyn alý jáne jol qozǵalysyna qatysýshylardyń qaýipsizdigin qamtamasyz etý boıynsha jumys jalǵasatyn bolady.
Aıta ketelik samokat miner aldynda neni bilý kerek: negizgi erejeler men jańa talaptar týraly jazǵan edik.
