Elordada 200-den asa úı apatty jaǵdaıda tur – Altaı Kólginov

NUR-SULTAN. QazAqparat – Elordada 200-den asa úı apatty kúıde tur. Muny Nur-Sultan qalasynyń ákimi Altaı Kólginov óziniń Іnstagram-daǵy resmı paraqshasynda jazdy, dep habarlaıdy QazAqparat tilshisi.

«Qalamyzda apatty kúıde turǵan 200-den asa úı bar. Sońǵy úsh jylda mundaı úılerden 700-ge jýyq otbasy kóshirildi. Bıyl taǵy 300-den astam otbasyny kóshirýdi josparlap otyrmyz. Elorda damý baǵdarlamasy júzege asyrylǵaly beri apatty úılerden 4 myń 200 otbasy kóshirildi. Budan bólek turǵyn úı keshenderin jóndeý jáne qaýipti lıftilerdi aýystyrý jumysy qolǵa alyndy. Máselen, Kúıshi Dına kóshesi boıynda ornalasqan úılerdiń ıelerin qabyldaý barysynda lıftilerdi aýystyrý máselesi kóterildi. Bul úıdegi lıftilerdiń bir bóligi aýystyryldy, qalǵan bóligin jańartý jumysy júrip jatyr. Osyǵan deıin 80 lıfti jańartyldy, bıyl taǵy 40-ǵa jýyq jedelsatyny jańartýdy josparlap otyrmyz. Keler jylǵy josparǵa ázirge 30 lıfti endi, tizimdi tolyqtyrý jumysy júrip jatyr», - dep jazdy bas shahardyń ákimi.

Aıta keteıik, bul ýaqytqa deıin Altaı Kólginov elordadaǵy turǵyn úı qurylysynyń qarqynyn báseńdetýdi usynǵan bolatyn.

Onyń aıtýynsha, quzyrly organdar jańa baspanalarǵa qajetti ınjenerlik jelilermen qamtamasyz etip úlgermeı jatyr.