Elordada 200 adam jınalǵan korporatıvtik kesh toqtatyldy
NUR-SULTAN. QazAqparat – Elordadaǵy meıramhanalardyń birinde 200 adamnyń qatysýymen ótip jatqan korporatıvtik kesh toqtatyldy, dep habarlaıdy QazAqparat qala ákimdiginiń resmı saıtyna silteme jasap.
Karantın talaptaryn buzý faktilerin anyqtaý jáne olarǵa jol bermeý jónindegi mobıldi toptar osy kúnderi kúsheıtilgen rejımde jumys isteýdi jalǵastyrýda.
20 jáne 21 naýryzda mobıldi toptar elordanyń tórt aýdanynda ornalasqan 10-nan astam mekemede karantındik shekteýlerdiń buzylýyn anyqtady.
Máselen, 20 naýryzda Baıqońyr aýdanynda ornalasqan «Porta fortuna» meıramhanasynda 200 qonaqtyń qatysýymen korporatıvtik kesh ótkizildi.
Sonymen qatar, qalanyń sanıtarlyq dárigeriniń qaýlysymen belgilengen jumys rejımine qaramastan «Ryba moeı mechty» karaoke zaly jáne «Shashlykoff» grıl bary kelýshilerge saǵat 22.00-den keıin de qyzmet kórsetken. Esil aýdanyndaǵy «ALANYA» karaoke-meıramhanasy da osyndaı buzýshylyqqa jol berdi.
Eki kúnniń ishinde Saryarqa aýdanynda mobıldi toptar 6 mekemedegi buzýshylyqtardy anyqtady.
Mysaly, «Gaýhartas» meıramhanasy saǵat 22.50-de kelýshilerdi qabyldaýdy jalǵastyrǵan. Tekserý kezinde mekemede 110 adam bolǵan.
Saǵat 00:00-den keıin «Dolche» karaoke bary jáne «Hıva» meıramhanasy da jumys istegen. Tyıym salynǵan ýaqytta «Sherbet», «Sky Smoke», «Nırvana» túngi klýby, barlar da ashyq boldy.
Almaty aýdanynda úsh qoǵamdyq tamaqtaný nysany - «The Dubliner», «Spasıbo patsanam» jáne «Chım-chım» kafeleri jumys rejımin buzdy.
Esterińizge sala keteıik, Nur-Sultan qalasy epıdemıologııalyq ahýaldy baǵalaý matrıtsasyna sáıkes 10 naýryzdan bastap «qyzyl» aımaqta tur. Osyǵan oraı, karantın rejımin buzýdy anyqtaý boıynsha mobıldi toptar kúsheıtilgen jumys rejımine kóshirildi.
Elordada COVІD-19 ınfektsııasy boıynsha epıdemıologııalyq jaǵdaı áli de turaqsyz dep baǵalanýda. Sondyqtan adam kóp jınalatyn oryndarǵa barýdan bas tartý jáne múmkindiginshe úıde bolý usynylady.
