Elordada 20 qyrkúıekte jalpyqalalyq senbilik ótedi

ASTANA. KAZINFORM – «Taza Qazaqstan. Astana – tazalyq pen tártiptiń úlgisi» atty aýqymdy ekologııalyq aktsııa aıasynda jáne Dúnıejúzilik tazalyq kúnine (World Cleanup Day) oraı osy senbi, 20 qyrkúıekte elordada jalpyqalalyq senbilik ótedi, dep habarlaıdy qala ákimdiginiń resmı saıty.

Senbilik barysynda qalanyń qoqystan tazartylýy, saıabaqtar men gúlzarlardyń, aýlalardyń, sondaı-aq saýda oryndaryna, qoǵamdyq tamaqtaný nysandaryna jáne basqa da uıymdarǵa irgeles aýmaqtardyń retke keltirilýi josparlanyp otyr.

Aýqymdy tazalyq jumysy aıasynda Astananyń alty aýdanynda aǵash otyrǵyzylady.

Ákimdik qalalyq kásiporyndardy, MIB (PIK), shaǵyn jáne orta bıznes sýbektilerin, eriktiler men belsendi turǵyndardy ekoaktsııaǵa qatysyp, tazalyqqa úles qosýǵa shaqyrady.

Eske sala keteıik, ekoaktsııanyń negizgi maqsaty – qoǵam nazaryn qalanyń kóshelerinde tazalyqty saqtaý máselelerine aýdarý jáne ekologııalyq mádenıetti qalyptastyrý.

Qala turǵyndary men uıymdary kósheler men aýlalardy abattandyrý isine úles qosa alady. Ekoaktsııa saǵat 10:00-de bastalady.

Eske sala keteıik, osyǵan deıin Astanadaǵy Backstreet Boys kontsertine arnaıy shattl-avtobýstar qatynaıtynyn jazǵan edik.