Elordada 20 eldiń mamany Islam qarjy naryǵyn damytýdy talqylaýda
NUR-SULTAN. QazAqparat – Elordada tuńǵysh ret TMD jáne Ortalyq Azııa elderiniń arasynda Islam qarjylandyrý qyzmeti keńesiniń (Islamic Financial Services Board - IFSB) otyrysy ótip jatyr, dep habarlaıdy QazAqparat tilshisi.
Bir apta boıy ótetin Keńes jıyny birneshe bólikten turady, onyń ishinde IFSB Tehnıkalyq komıtetiniń otyrysynda IFSB-ge múshe elderdiń ortalyq bankteri men retteýshileriniń ókilderi qatysady. Sonymen qatar, ıslam qarjy kapıtaly salasynda ınvestorlardyń quqyǵyn qorǵaý, ıslamdyq depozıtter kepildiginiń tıimdi júıesin qurý boıynsha jumys toptarynyń kezdesýleri ótýde.
«Islam qarjylandyrýy AHQO-nyń negizgi baǵyttarynyń biri. AHQO-da halyqaralyq talaptarǵa, sonyń arasynda IFSB talaptaryna saı qajetti quqyqtyq normatıvtik baza qurylǵan. Mundaı is-sharalar Islam qarjylandyrýy boıynsha aqparatty keńeıtedi ári ıslam qarjy naryǵy ókilderi men retteýshileri arasyndaǵy dıalogty ornatatyn alań retinde tıimdi», - dedi «Astana» halyqaralyq qarjy ortalyǵy basqarýshysy Qaırat Kelimbetov.
Aıta keteıik, keńes otyrysyna BAÁ, Oman, Saýd Arabııasy, Brýneı, Malaızııa, Katar jáne taǵy da basqa 20 elden ókilder qatysty.
IFSB -ıslam qarjylandyrýy ınstıtýttarynyń tıimdi qadaǵalanýy men retteýi boıynsha talaptardy daıyndaıtyn halyqaralyq organ.
AHQO 2017 jyldan beri IFSB-nyń turaqty ókili. Bul uıymnyń ókili bolý ıslam qarjylandyrýy ınstıtýttarynyń biregeı talaptaryn daıyndaý kezinde tıimdi yqpaldastyq tanytýǵa kómektesedi.
AHQO-nyń normatıvti-quqyqtyq bazasy halyqaralyq jáne IFSB talaptaryna saı jasalynǵan. AHQO ókilderi ıslam qarjylandyrý zańdylyǵyn damytý boıynsha talaptardy daıyndaıtyn Tehnıkalyq Komıtet men jumys toptarynyń quramyna da engen. Osyndaı is-sharalar AHQO-nyń Islam qarjylandyrýy jáne bıznes Habi retindegi pozıtsııasyn nyǵaıtady.
