Elordada 2 órt saldarynan eki adam qaza tapty
NUR-SULTAN. QazAqparat - Keshe elordada oryn alǵan 2 órt saldarynan eki adam qaza tapty. Bul týraly Nur-Sultan qalalyq TJD Memlekettik órt baqylaý basqarmasynyń bastyǵy Erkin Otarǵalymuly aıtty, dep habarlaıdy QazAqparat tilshisi.
«Búgingi tańda 24 myńnan astam jeke turǵyn úıdi aralap, turǵyndarmen órt qaýipsizdigi taqyrybynda túsindirý jumysy júrgizildi. Degenmen, statıstıkalyq málimetterge qaraıtyn bolsaq, turǵyndardyń barlyǵy birdeı qaýipsizdik erejesin saqtaı bermeıdi. Jylytý maýsymyndaǵy órttiń shyǵý sebebiniń biri peshterdiń órt qaýipsizdigi erejelerine saı paıdalanylmaýy bolyp otyr. Bul rette qala turǵyndary men qonaqtaryna jylý peshterin shamadan tys qyzdyrmaýǵa keńes beremiz. ıAǵnı, peshti tálik ishinde 1 ret emes birneshe ret jaqqan abzal ekenin eskertemiz», - dedi ol.
Onyń aıtýynsha, mektepter men balabaqshalar jumysyna engizilgen shekteýge baılanysty balalardy úıde jalǵyz qaldyrmaý kerek. Janyp jatqan peshti balalarǵa baqylap otyrýǵa tapsyrmaǵan jón.
«Sonymen qatar turǵyndar úılerin jylytý úshin elektr jylytqyshtardy paıdalanady. Mundaı quraldarda qyzǵan kezde avtomatty túrde óshiretin rettegishi bolýy jáne radıatorynda maı bolýy tıis», - dedi Erkin Otarǵalymuly.
Basqarma bastyǵynyń dereginshe, keshe ǵana elordada 2 órt tirkelip, 2 adam qaza tapqan. Birinshi oqıǵada ishimdikke mas bolǵan er adam temeki shegip jatyp uıyqtap ketse, ekinshisinde órttiń shyǵýyna janyp turǵan maısham sebep bolǵan.
