Elordada 2 balany anasyna qaıtarmaı qashyp júrgen er adam izdestirilýde
NUR-SULTAN. QazAqparat – Elordadaǵy prokýratýra qyzmetkerleri eki balany anasyna qaıtarmaı, ıaǵnı sot sheshimin oryndamaı qashyp júrgen er adamdy izdestirip jatyr, dep habarlaıdy QazAqparat tilshisi.
«J. atty azamatsha óziniń burynǵy kúıeýinen 10 jáne 11 jastaǵy balalaryn ala almaı júr. Ana retinde ol balalaryn ózi qaraýyna alǵysy keledi. Alaıda burynǵy kúıeýi bul nıetine barynsha kedergi keltirýde. Áıel aldymen sotqa júginip kórgenimen onyń bul aryzy qanaǵattandyrylmaǵan. Sebebi qamqorlyq quqyǵy áý basta er adamǵa berilgen», - dep habarlaıdy Jeke sot oryndaýshylarynyń Nur-Sultan qalalyq palatasynan.
Keıin appelıatsııalyq ınstantsııa sot-psıhologııalyq saraptama negizinde aldyńǵy sot sheshimin ózgertipti. ıAǵnı psıholog eki bala ákelerinen qysym kórip júrgenin, olarǵa ana tárbıesi kerektigin málim etken.
«Keıingi úsh jylda balalar ákesimen turyp jatyr. Alaıda sottyń sońǵy sheshimine sáıkes olar anasyna qaıtýy kerek. Alaıda er adam bul sheshimmen múlde kelispeı, páterden páterge kóship, balalardyń anasy men sot oryndaýshylardan qashyp júr. Qazir máselen bul isti qolǵa alǵan tórtinshi sot oryndaýshysy tyǵyryqqa tirelip tur. Óıtkeni er adamǵa qazir izdeý jarııalanǵan. Qazir er adamdy prokýrorlar izdep jatyr», - delingen habarlamada.
