Elordada 2,4 shaqyrym sý qubyry qaıta jóndelip jatyr
NUR-SULTAN. QazAqparat – Bıyl Nur-Sultan qalasynda 2,4 shaqyrymdy quraıtyn sý qubyry jelisine qaıta jóndeý jumystary júrip jatyr. Bul týraly «Astana sý arnasy» mekemesi ekonomıkalyq josparlaý bóliminiń bas mamany Vıtalıı Artamonov málim etti, dep habarlaıdy QazAqparat tilshisi.
«Ótken jyly bizdiń mekeme 1 471 mln teńgeni quraıtyn jeke ınvestıtsııa qarajatyna birqatar jumys atqardy. Atap aıtqanda, 883 mln teńgege 6,3 shaqyrymdy quraıtyn sý qubyry jáne 2,3 shaqyrym káriz jelisi qaıta jóndeýden ótti. Sondaı-aq, 231 mln teńge qarjyǵa eskirgen 44 sý sorǵysh jańasyna aýystyrylyp, káriz qaldyǵyn soratyn 16 stantsııa ornatyldy. Odan bólek, 301 mln teńgege jańa qural-jabdyq satyp alyndy. Onyń qatarynda, sý súzgish quraldary, avtomattandyrylǵan natrıı gıpohlorıti apparaty, derekter bazasyn saqtaıtyn serverlik qurylǵy jáne taǵy basqa», - dedi Vıtalıı Artamonov BAQ ókilderine arnalǵan baspasóz týry barysynda.
Onyń aıtýynsha, bıyl 8 aıdyń qorytyndysy boıynsha 449 mln teńgeni quraıtyn ınvestıtsııa qarajaty ıgerildi.
«Bıyl da ınvestıtsııalyq baǵdarlama aıasynda birqatar sharýa tynyp jatyr. Jyl sońyna deıin qala boıynsha káriz qaldyǵyn sorǵysh 8 stantsııanyń qurylǵylary jańalanady. Sonymen qatar búginde tozǵan jáne apat jaǵdaıyndaǵy 2,4 shaqyrymdy quraıtyn sý qubyry jelisine qaıta jóndeý jumysy júrip jatyr. Odan bólek, 250 metr káriz jelisi qaıta jóndelmek», - deıdi ol.
Buǵan deıin habarlaǵanymyzdaı, búgin Nur-Sultan qalasynda ınvestıtsııalyq baǵdarlamalardyń oryndalý barysyna baqylaý jasaldy.
Atalǵan sharaǵa qalalyq Tabıǵı monopolııalardy retteý departamentiniń mamandary, qalalyq máslıhat depýtaty jáne BAQ ókilderi qatysty.
Onyń barysynda «Astana sý arnasyna» baǵynyshty birneshe nysannyń jumysy tanystyryldy.
