Elordada 2 084 kóp páterli turǵyn úı bar

ASTANA. 25 qańtar. QazAqparat - Astana qalasy turǵyn úı qorynyń kólemi - 2 084 kóp páterli úı. Qarqyndy júrgizilgen qurylys jumystaryna qaramastan, elordada eski úıler azaımaı otyr. Bul týraly qalalyq Tuǵyn úı ınspektsııasynan málim etti.

«Qazaqstannyń qoldanystaǵy zańdaryna sáıkes turǵyn úılerdi eskirgen jáne apatty dep taný úshin onyń paıyzdyq mólsherdegi tehnıkalyq jaǵdaıyna jasalǵan akti bolýy qajet. Akt qorytyndysyn ınjenerlik-izdestirý jumystaryn oryndaýǵa tirkelgen qyzmetkerleri bar mamandandyrylǵan mekeme, sondaı-aq, Astana qalasynyń Tótenshe jaǵdaılar departamenti bere alady. Eskirýi 61%-dan asqan turǵyn úılerdi jóndeýden ótkizý ekonomıkalyq jaǵynan maqsatty dep sanalmaıdy. Olar birden buzylýy tıis», - dep jazady elordanyń resmı saıty.

Degenmen, kóptegen turǵyndardy úıleri eskirgen, biraq kúrdeli jóndeý jumystaryn júrgizýge bolatyn jaǵdaıda ne isteý kerek degen saýal mazalaıdy. QR «Turǵyn úı qatynastary týraly» Zańynyń 35 babyna sáıkes, turǵyn jaı (páter) ıeleri jekemenshiktegi jalpy múlik pen orynjaılardy ustaý úshin jumsalatyn barlyq shyǵyndardy birge kóterýi mindetti jáne onyń oryndalýyna jaýapty bolady. Ǵımaratty jóndeýge talap etiletin qarjy kólemin barlyq turǵyndardyń birden tóleýge múmkindigi bola bermeıdi.

Qazirgi ýaqytta turǵyn úı qorynyń jaǵdaıyn jaqsartý maqsatynda Turǵyn úı kommýnaldyq sharýashylyǵyn jańǵyrtýdyń memlekettik baǵdarlamasy iske asyrylyp jatyr. Baǵdarlamanyń mańyzy bıýdjettik qarjylandyrýdyń keri mehanızmi negizinde, kóp páterli turǵyn úıdiń ortaq múlkin kúrdeli jóndeý. Basqasha aıtqanda, memleket turǵyndarǵa «nesıe» beredi, olar nesıeni kezeń-kezeńimen belgili ýaqyt ishinde qaıtarady.

Turǵyn úı kommýnaldyq sharýashylyǵyn jańǵyrtý baǵdarlamasyna turǵyn úıdi qosý úshin:

1. Turǵyn úıdiń kondomınıým nysanyn ádilet organdarynda tirkeý qajet;

2. Osy turǵyn úıdiń kondomınıým nysanyn basqaratyn organdy tańdaý qajet (PIK, ÓBK, Basqarý kompanııasy jáne t.b.);

3. Páter ıeleriniń hattamalyq jınalysyn rásimdeý jáne turǵyn úıdi kúrdeli jóndeý qajet (turǵyndardyń keminde 66,7%-y kelisýi tıis).