Elordada 1929-1940 jyldary latyn álipbıimen jazylǵan kitaptar kórmesi ótedi
ASTANA. QazAqparat - «Qazaqstan-2050» jalpyulttyq qozǵalysy QR Ulttyq akademııalyq kitaphanasymen birlesip, 4 tamyz kúni «MEGA Silk Way» OSO-da «Men qoldaimyn» sharasy aıasynda «Qazaq kitaptary 1929-1940» atty latyn álipbıimen jazylǵan kitaptardyń kórmesin ótkizedi, dep habarlaıdy QazAqparat.
Jalpyulttyq baspasóz qyzmetiniń málimetinshe, sharanyń negizgi maqsaty - Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda aıtylǵan kırıllıtsa negizindegi qazaq álipbıin latyn álipbıine kóshirý bastamasyna qoldaý bildirý.
Kórmege qazaq zııaly qaýym ókilderiniń 1929-1940 jyldary shyqqan eńbekteri qoıylady. Sonymen qatar, sheteldik aqyn-jazýshylardyń eńbekterin de osy kórmeden tamashalaýǵa bolady.
Memleket basshysy Nursultan Nazarbaev: «Latynshaǵa kóshýdiń tereń logıkasy bar. Bul qazirgi zamanǵy tehnologııalyq ortanyń, kommýnıkatsııanyń, sondaı-aq, HHІ ǵasyrdaǵy ǵylymı jáne bilim berý protsesiniń erekshelikterine baılanysty» dep atap ótken bolatyn.
Latyn álipbıi negizindegi qazaq álipbıin jasaý ıdeıasyn otandyq ǵalymdarmen qatar sheteldik ǵalymdar qoldady. Qazirgi ýaqytta qoǵam talqysyna keńinen salynyp, halyq tarapynan qoldaý tapqan bastamaǵa «Qazaqstan-2050» jalpyulttyq qozǵalysy da ún qosyp otyr.
Foto:e-history.kz
