Elordada 19 myń adam revaktsınatsııa jasady

NUR-SULTAN. QazAqparat – Elordada 19 myń adam revaktsınatsııa aldy. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlady QazAqparat tilshisi.

«29 jeltoqsanda qala boıynsha ınfektsııalyq statsıonarlarda 260 adam, onyń ishinde 42 adam reanımatsııada jatyr. Ókpeni jasandy jeldetý apparatynda 14 naýqas bar. Mýtatsııalanǵan vırýstyń aldyn alý jáne odan qorǵaý maqsatynda elordada halyqty koronavırýsqa qarsy vaktsınatsııalaý jalǵasýda. Qala boıynsha vaktsınanyń birinshi komponentin 485 myń azamat aldy, 454 myń turǵyn ımmýndaýdyń tolyq kýrsynan ótti. Vaktsınatsııaǵa jatatyn halyqtyń kóp bóligine ekpe saldyq. Biraq bul vırýsty tolyǵymen jeńý úshin jetkiliksiz. Vaktsınatsııa kezinde ekpe alýǵa degen azamattardyń sana-sezimi sheshýshi ról atqarady», - dedi basqarma basshysy qala ákimdiginde ótken baspasóz máslıhatynda.

Onyń dereginshe, vaktsınatsııa pýnktileri 36 medıtsınalyq uıymda jáne «Kerýen», «Abý-Dabı Plaza», «Azııa park» oıyn-saýyq ortalyqtarynda, «Eýrazııa» saýda úıinde ornalasqan.

«22 qarashada búkil el boıynsha azamattardy koronavırýs ınfektsııasyna qarsy revaktsınatsııa bastaldy. Búgingi kúni qala boıynsha medıtsınalyq qyzmetkerler, pedagogtar, kúsh qurylymdarynyń qyzmetkerleri, 60 jastan asqan jáne ımmýnıteti tómen adamdar, medıtsınalyq-áleýmettik mekemelerdiń personaly men kontıngenti qatarynan 19 myń adam revaktsınatsııa aldy. Revaktsınatsııa sanıtarlyq normalar men komponentter arasyndaǵy aralyqty qatań saqtaı otyryp júrgiziledi», - dedi Tımýr Muratov.