Elordada 19 mln teńgeniń dári-dármegin zańsyz satqandar ustaldy
NUR-SULTAN. QazAqparat – Nur-Sultan qalasynyń polıtseıleri zańsyz satylyp jatqan medıtsınalyq preparattardy tárkileý boıynsha reıd jumystaryn júrgizip jatyr, dep habarlaıdy QazAqparat astanalyq polıtsııa departamentiniń baspasóz qyzmetine silteme jasap.
Polıtseıler men qalalyq prokýratýra ókilderinen quralǵan monıtorıng toby QR zańnamasyn buzý faktisin anyqtaý úshin astanalyq dárihanalarǵa reıd júrgizip jatyr.
Reıd bastalǵaly QR zańnamasyn buza otyryp medıtsınalyq dári-dármekti satýdyń 84 faktisi anyqtaldy, 96 adam ustaldy.
5 026 qap dári, 179 dene qyzýyn ólsheıtin qural, 250 myńnan astam medıtsınalyq maska, 20 myńǵa jýyq medıtsınalyq qolǵap, 679 lıtr antıseptık tárkilendi. Tárkilengen preparattardyń jalpy sommasy 19 mln teńgeni qurady.
Dári-dármek baǵasyn kóterip satqan 50 tulǵa jaýapkershilikke tartyldy, 400 dárihana tekserildi. Reıd júrgizgen eki kún ishinde medıtsınalyq preparattardyń baǵasyn kóterip jibergen 11 dárihana anyqtaldy.
Atalǵan azamattardyń barlyǵy QR zańnamasyna sáıkes jaýapkershilikke tartylady.
