Elordada 180 myńǵa jýyq oqýshy jazǵy lagerlerde demaldy
ASTANA. KAZINFORM — Astanada 180 myńǵa jýyq bala jazǵy jazǵy demalyspen qamtyldy, dep habarlaıdy elorda ákimdiginiń resmı saıty.
Astanada balalardyń jazǵy demalysyn qaýipsiz ári mazmundy uıymdastyrý baǵytynda jumys júrip jatyr. Bıyl elordada 242 myńnan astam oqýshyny jazǵy demalys jáne saýyqtyrý sharalarymen qamtý josparlanǵan. Búginde demalystyń alǵashqy eki kezeńiniń qorytyndysy boıynsha 180 myńǵa jýyq bala túrli lagerler men jazǵy jobalarǵa qatysyp, jazǵy ýaqytyn tıimdi ótkizdi. Qazir úshinshi maýsym óz jumysyn jalǵastyryp jatyr.
Jazǵy demalys barysynda balalardyń bos ýaqytyn tıimdi uıymdastyrýǵa, olardyń shyǵarmashylyq, sporttyq jáne zııatkerlik qabiletterin damytýǵa erekshe kóńil bólinip otyr. Sonymen qatar áleýmettik osal sanattaǵy otbasylardan shyqqan balalardy demalyspen qamtýǵa basymdyq berilip otyr. Osy jazda 11 myńnan astam bala saýyqtyrý sharalaryna qatyssa, onyń ishinde 2 681 oqýshy jergilikti bıýdjet esebinen qala syrtyndaǵy lagerlerge joldama aldy.
Balalardy qabyldap jatqan iri demalys oryndarynyń biri — «Barap» balalardy saýyqtyrý lageri. Jaz boıy munda 1 600-den astam bala demalady. Lagerde balalardyń qaýipsiz ári sapaly tynyǵýyna barlyq jaǵdaı jasalyp, olar sporttyq jarystarǵa, shyǵarmashylyq úıirmelerge, mádenı-tanymdyq jáne zııatkerlik baǵdarlamalarǵa qatysyp, jańa ortada dostar taýyp, óz qabiletterin shyńdap jatyr.
Budan bólek, elordadaǵy mektep janyndaǵy jáne beıindik lagerler, qosymsha bilim berý uıymdarynyń janyndaǵy taqyryptyq klýbtar da jumysyn jalǵastyryp keledi. «Dıdarly jaz — 2026» jobasy aıasynda oqýshylar sportpen shuǵyldanyp, salaýatty ómir saltyn nasıhattasa, «Atameken» etno-lagerlerinde ulttyq qundylyqtar men salt-dástúrdi dáripteıtin tanymdyq baǵdarlamalarǵa qatysyp jatyr.
— Balalardyń qaýipsizdigi jazǵy demalysty uıymdastyrýdaǵy basty basymdyqtardyń biri bolyp qala beredi. Osyǵan baılanysty bilim berý uıymdary polıtsııa, tótenshe jaǵdaılar qyzmeti, densaýlyq saqtaý jáne sanıtarııalyq-epıdemıologııalyq baqylaý mamandarymen birlesip profılaktıkalyq jumystar júrgizýde. Barlyq lagerlerde qaýipsizdik talaptarynyń saqtalýy turaqty baqylaýda, — delingen habarlamada.
Osyǵan deıin «Semeı ormany» rezervatynda órt shyqqan soń lagerdegi 200-ge jýyq bala evakýatsııalanǵany belgili boldy.
