Elordada 18 naýryzǵa josparlanǵan aýqymdy sharalar ótpeıtin boldy

NUR-SULTAN. QazAqparat – Nur-Sultan qalasynyń ákimdigi Naýryz merekesi qarsańyndaǵy aýqymdy sharalar ótpeıtinin jarııalap, adam jınalatyn josparly is-sharalardy uıymdastyrmaýǵa shaqyrdy, dep habarlaıdy QazAqparat tilshisi.

«Búgingi tańda koronavırýstyń álemdik pandemııa bolyp jarııalanýyna jáne Memleket basshysy Qasym-Jomart Toqaevtyń arnaıy aldyn alý sharalaryn iske asyrý týraly málimdemesine baılanysty elordada barlyq buqaralyq is-sharalar uıymdastyrylmaıdy. Sondaı-aq 18 naýryzǵa josparlanǵan «Qazaq eli» monýmenti alańynda, qalalyq alańda, «Jazýshylar» alleıasynda, «Astana» kontsert zalyndaǵy sharalar da ótkizilmeıdi», - dep habarlady qala ákiminiń baspasóz hatshysy Aqmaral Oljabaeva.

Onyń habarlaýynsha, Q.Qýanyshbaev atyndaǵy memlekettik akademııalyq qazaq mýzykalyq-drama teatry, M. Gorkıı atyndaǵy memlekettik akademııalyq orys teatry men Qýyrshaqtar teatrynda da spektaklderdiń qoıylymy bolmaıdy.

Sonymen qatar qala basshylyǵy bazar, saýda-oıyn-saýyq ortalyǵy, saýda úıi syndy nysandardyń ishinde jáne aýmaǵynda is-sharalar ótkizbeýdi usynady.

Eske sala ketsek búgin Memleket basshysy Qasym-Jomart Toqaev Naýryz merekesine arnalǵan sharalardy jáne áskerı paradty ótkizbeý jóninde tapsyrma bergen bolatyn.