Elordada 18 adam KSRO tólqujatymen júrgen
NUR-SULTAN. QazAqparat - Elordanyń kóshi-qon polıtsııasy KSRO tólqujatyn der ýaqytynda aýystyrmaǵan 18 azamatty anyqtady, dep habarlaıdy QazAqparat tilshisi.
Sonymen qatar jasy 18-den asqan elordanyń 30 turǵyny jeke kýálik alý úshin kóshi-qon qyzmetine júginbegen.
«Mundaı tulǵalardy anyqtaý belgili bir deńgeıde qıyndyq týdyrady. Óıtkeni, Qazaqstan azamaty ekendigin aıqyndaý jáne odan ary jeke kýálik rásimdeý úshin adam ózi kelýi tıis. Keńestik tólqujatpen júrgendigi jáne jeke kýáligi joq ekendigi anyqtalǵan tulǵalardyń barlyǵyna olardyń mártebesin anyqtaý ári Qazaqstan azamatynyń qujatyn rásimdeý kómegi kórsetildi», - dedi kóshi-qon polıtsııasynyń basshysy Arman Baımuhambet.
Máselen, Nur-Sultan qalalyq polıtsııa departamenti málimetinshe, polıtsııaǵa 1956 jyly Belarýsta alǵan tólqujatyn aýystyrmaǵan 81 jastaǵy áıel júgindi. 1957 jyly tyńǵa kelgen ol sol ýaqyttan beri Qazaqstanda turyp jumys istegen. Tólqujaty men týý týraly kýáligin joǵaltyp alýyna baılanysty qujattaryn rásimdeı almaǵan. Elordanyń kóshi-qon qyzmetiniń qyzmetkerleri «Qazaqstan Respýblıkasynyń azamattyǵy týraly» Zańǵa sáıkes azamatshanyń quqyqtyq mártebesin anyqtap, oǵan jeke kýálik jasap bergen.
