Elordada 18 600-den astam adam Pfizer preparatymen egildi

NUR-SULTAN. QazAqparat - Elordada turǵyndardy KVI-ge qarsy vaktsınatsııalaý qarqyny artyp keledi. Qala boıynsha barlyǵy birinshi komponentpen halyqtyń 67,8% vaktsınatsııalandy, dep habarlaıdy QazAqparat qala ákimdiginiń resmı saıtyna silteme jasap.

Erekshe belsendilik jasóspirimder arasynda baıqalady, dep atap ótti qalalyq Densaýlyq saqtaý basqarmasynda.

Búgingi tańda Nur-Sultanda 18 600-den astam adam Pfizer preparatymen egildi. Onyń 12 myńnan astamy-12-17 jastaǵy balalar, 6 myńǵa jýyǵy bala emizetin áıelder jáne 400-den astamy júkti áıelder.

Densaýlyq saqtaý basqarmasynda atap ótkendeı, vaktsınatsııa pýnkteri negizinen jumys kúnderi toltyrylady.

«Biz demalys kúnderi adamdar óz isterimen aınalysatynyn, otbasylarymen ýaqyt ótkizetinin túsinemiz, sondyqtan vaktsınatsııanyń ósýi jumys kúnderine keledi. Biraq, osyǵan qaramastan, egý pýnkteri demalys jáne mereke kúnderi de jumysyn jalǵastyrýda», - dep habarlady vedomstvodan .

Sondaı-aq, elordada turǵyndardyń revaktsınatsııasy jalǵasýda. Revaktsınatsııanyń bir aıynda 13 myńnan astam adam KVI-ǵa qarsy úshinshi ret vaktsına aldy.

Esterińizge sala keteıik, medıtsınalyq uıymdarda da, saýda keshenderinde de qaıta vaktsınatsııalaýǵa bolady. Al Pfizer alý úshin medıtsınalyq uıymdar men elordalyq mektepterdiń vaktsınatsııa pýnkterine ǵana júginý qajet. Qazirgi ýaqytta amerıkandyq vaktsına tek júkti jáne bala emizetin áıelderge, 12 jastan 18 jasqa deıingi balalarǵa arnalǵan.