Elordada 150 adamǵa toı ótkizgen meıramhana ıesine aıyppul salynbaq

NUR-SULTAN. QazAqparat – Elordada karantın ýaqytynda 150 adam shaqyrylǵan úılený toıy ótkizilgen. Bul jaıynda Nur-Sultan qalalyq polıtsııa departamentinen málim etti, dep habarlaıdy QazAqparat tilshisi.

Aıta keterligi, Nur-Sultan qalasy «qyzyl» aımaqta tur. Soǵan baılanysty pandemııanyń taralýyna jol bermeý úshin birqatar shekteý is-sharasy qabyldanǵan. Onyń ishinde saltanatty, otbasylyq jáne basa da toı-tomalaq ótkizýge tyıym engizilgen. Osyǵan oraı karantın rejımin buzýshylardy anyqtaý maqsatynda quramynda polıtsııa qyzmetkerleri, ákimdik pen Sanıtarlyq-epıdemıologııalyq baqylaý basqarmasynyń ókilderi bar mobıldi top jumys isteýde.

«Qoldanystaǵy tyıymǵa qaramastan Tilendıev dańǵylyǵyndaǵy «Dýdaraı» meıramhanasynyń banket zaly karantın is-sharalaryn saqtamaǵan qonaqtarǵa toly boldy. Mobıldi top teksergen sátte toı qyzyp, meıramhanada shekteý sharalaryn qaperden shyǵarǵan 150 adam kóńil kóterip jatqan. Meıramhana ıesiniń ústinen jınaqtalǵan materıal QR Ákimshilik quqyq buzýshylyq týraly kodekstiń 425-babymen ákimshilik is qozǵaý úshin ókiletti organdarǵa jiberildi», - dedi departamentten.