Elordada 15 shaqyrymdyq alaman báıge ótti
NUR-SULTAN. QazAqparat - Elordadaǵy «Qazanat» ıppodromynda alaman báıge ótti, dep habarlaıdy QazAqparat.
Bul shara «Etnoaýyl» ulttyq-mádenı demalys kesheniniń bıylǵy ashylý saltanatyna oraı ótkizildi.
15 shaqyrymdyq alaman báıgege elimizdiń túpkir-túpkirinen ákelingen júırikter qatystyryldy.
Báıgede baby men baǵy qatar ozǵan elordalyq Ómirzaq Nurıslamnyń «Sát» atty júırigi márege birinshi jetti. Ekinshi Maqsat Túkenovtyń «Altynkóz» tulpary, al úshinshi bolyp qaraǵandylyq Aınar Nyǵymetovtyń «Amanat» júırigi jeńis tuǵyrynan kórindi. Tórtinshi jáne besinshi oryndardy Almaty oblysynan kelgen Ulan Omarovtyń «Shartassy» men almatylyq Maqsat Ahaevtiń «Nurıslam» atty tulparlary aldy.
Alamandy kelgen qonaqtar «etnoaýyl» aýmaǵynda qazaqtyń ulttyq taǵamynan dám tatyp, qolóner sheberleriniń kórmesin tamashalady.
«Búginnen bastap «Etnoaýyl» ulttyq mádenı kesheni óz esigin aıqara ashty. Bul bizdiń ótkizip jatqan alǵashqy sharalarymyzdyń biri. Elorda kúni qarsańynda 150 at báıgege tigiletin úlken alaman uıymdastyrýdy josparlap otyrmyz. Sonymen birge, «Etnoaýyl» kesheniniń jumystaryn jandandyrýdy qolǵa alýdamyz. Bul jer kóshpendilerdiń rýhyn sezindiretin, qazaq halqynyń baı tarıhymen, ónerimen jáne dástúrimen tanystyratyn jer bolady. Biz bolashaqta «Etnoaýyldy» bolashaqta qalanyń damylsyz tirliginen jalyqqandar demalatyn mekenge aınaldyrǵymyz keledi», - deıdi «Bolat tuıaq» qoǵamdyq birlestiginiń tóraǵasy Jaqyp Baımollauly.
