140 sarbaz Jaýyngerlik týmen qoshtasty, onyń 20-sy áskerı salada qalýdy qup kórgen

Saltanatty rásimge áskerı bólim qolbasshylyǵy, Astana qalasy qorǵanys isteri jónindegi departamentiniń ókilderi, Qarýly kúshterdiń, Aýǵan soǵysynyń jáne jergilikti qaqtyǵystardyń ardagerleri qatysty.

Jıynda sóz alǵan «Qarýly kúshterdiń ardagerleri» respýblıkalyq qoǵamdyq birlestigi tóraǵasynyń orynbasary otstavkadaǵy general-maıor Marat Naǵumanov Otan qorǵaý — ár azamattyń qasıetti boryshy ekenin atap ótti. Ol sarbazdardyń el aldyndaǵy adal qyzmetine joǵary baǵa berip, birqatar áskerı qyzmetshilerdi gramotamen marapattady.

Bir jyl ishinde jas jaýyngerler zamanaýı áskerı tehnıkany meńgerip, qarý-jaraqtyń barlyq túrinen atý sheberlikterin shyńdady. Sondaı-aq túrli oqý-jattyǵýlarǵa qatysyp, áskerı daıyndyq deńgeıin arttyrdy.

Bólim komandıri polkovnık Abaı Álibekov sarbazdardyń qyzmetine alǵysyn bildirip, aldaǵy azamattyq ómirlerine sáttilik tiledi.

— Sender áskerı qyzmet barysynda tártipke baǵynyp, kásibı bilim men daǵdylardy ıgerdińder. Sonyń nátıjesinde Otan qorǵaýǵa daıyn, sanaly azamat bolyp qalyptastyńdar. Bul tájirıbe aldaǵy ómir joldaryńda ózderińe zor paıdasyn tıgizetinine senimdimin. Barshańa sáttilik tileımin, — dedi ol.

Bólim qolbasshylyǵy barlyq áskerı qyzmetshilerge adal qyzmeti úshin alǵys aıtyp, gramotalar men estelik syılyqtar tabys etti.

Dástúr boıynsha Jaýyngerlik týmen qoshtasý qurmeti úzdikterdiń úzdigi qatardaǵy jaýynger Saǵı Rahatqa berildi. Bul — onyń áskerı qyzmettegi tabandylyǵy men jetistikteriniń aıqyn dáleli.

Áskerge deıin sportpen aınalysqan efreıtor Janaıdar Jaqypov úshin bólimdegi bir jyl tabysty boldy. Ol jýyrda ǵana Shymkent qalasynda Arnaıy operatsııalar kúshteri qolbasshysynyń kýbogy úshin ótken armııalyq qoıan-qoltyq urysta 65 keli salmaq dárejesinde birinshi oryndy ıelengen bolatyn. Búgingi is-sharada Janaıdarǵa chempıon beldigi, úzdik dárejeli «Jaýynger sportshy» tósbelgisi jáne kshi serjant áskerı ataǵy saltanatty jaǵdaıda tabys etildi. Sonymen birge atalǵan baıraqty básekede 90 keliden joǵary salmaq dárejesinde aǵa leıtenant Toıyr Dosov ekinshi, al 90 keli salmaq dárejesinde kelisimshart qyzmetiniń serjanty Dáýren Shyrynhanov úshinshi oryndy ıelengenin aıta ketý kerek. Eki jeńimpaz da 68665 áskerı bóliminiń áskerı qyzmetshileri.

Búginde Janaıdar Jaqypov kelisimshart negizinde qyzmetin jalǵastyrý týraly naqty sheshim qabyldaǵan. Jalpy, bólimde mundaı nıet bildirgen sarbazdar az emes. Polkovnık Abaı Álibekovtiń aıtýynsha, 140 jaýyngerdiń jıyrmaǵa jýyǵy kelisimshartpen qyzmette qalýǵa nıetti. Sonymen qatar zapasqa shyǵarylǵan sarbazdardyń shamamen 15 paıyzynyń memlekettik grant negizinde joǵary bilim alýǵa múmkindigi bar.

Astanalyq arnaıy maqsattaǵy 68665 áskerı bólimi qurylǵan kúnnen bastap eldiń mańyzdy strategııalyq nysandaryn qorǵaý mindetin abyroımen atqaryp keledi. Bólimniń áskerı qyzmetshileri kez kelgen tapsyrmany oryndaýǵa qabiletti ekenin talaı márte dáleldedi. Búginde bul áskerı bólim elordadaǵy eń úzdik, elıtalyq quramalardyń biri sanalady.

Eske sala keteıik, buǵan deıin byltyr Otan qorǵaýǵa attanǵan 1200-den astam sarbazdyń alǵashqy legi oralǵanyn jazdyq.