Elordada 14 myńǵa jýyq memlekettik qyzmetshi eńbek etedi

NUR-SULTAN. QazAqparat – Nur-Sultan qalasynda 14 myńǵa jýyq memlekettik qyzmetshi eńbek etedi. Bul týraly QR Memlekettik qyzmet isteri agenttiginiń tóraǵasy Anar Jaıylǵanova aıtty, dep habarlaıdy QazAqparat.

A.Jaıylǵanova Facebook-tegi paraqshasynda qazaqstandyqtardy Elorda kúni merekesimen quttyqtady.

«23 jyl ishinde el astanasy zamanaýı, qarqyndy damyp kele jatqan, qaıtalanbas kelbeti men arhıtektýralyq stıli bar qalaǵa aınaldy. Nur-Sultan halyqaralyq deńgeıde tanymal Qazaqstannyń basty kórikti shahary boldy. Osynyń bári – Qazaqstannyń Tuńǵysh Prezıdenti-Elbasy Nursultan Ábishuly Nazarbaevtyń orasan zor eńbeginiń nátıjesi.

Qazaqstan tarıhynda elorda ataýy men Elbasynyń esimi egiz uǵym. Sebebi Nursultan Nazarbaev elordany el ortalyǵyna aýystyrý týraly tarıhı sheshim qabyldaǵany belgili», - dep jazdy agenttik basshysy.

Onyń aıtýynsha, el astanasy – Qazaqstan memlekettiliginiń basty rámizderiniń biri, búkil álemge tanymal brend.

«Búgingi tańda Nur-Sultanda el men onyń azamattarynyń ıgiligi jolynda ortalyq jáne jergilikti atqarýshy organdarda 14 myńǵa jýyq memlekettik qyzmetshi eńbek etýde. Árıne, memlekettik qyzmetshilerdiń Otanymyzdyń elordasynda qyzmet etetindikterin uǵynýy olar úshin kásibı ósýge qosymsha ynta beretini jasyryn emes.

Barlyq qazaqstandyqtardy Elorda kúnimen quttyqtaımyn!», - dedi A.Jaıylǵanova.