Elordada 137 baǵdarsham ıntellektýalyq kólik júıesine qosyldy

NUR-SULTAN. QazAqparat - 2015 jyly elordada ıntellektýaldy kólik júıesi tanystyryldy. Búgingi kúni oǵan qaladaǵy 504 baǵdarsham nysanynyń 137-i qosyldy, dep habarlaıdy QazAqparat qala ákimdigine silteme jasap.

Qalalyq Kólik jáne jol-kólik ınfraqurylymy basqarmasynyń málimetine sáıkes, Nur-Sultan joldarynyń 35% ıntellektýaldyq kólik júıesimen qamtyldy. Qazir jobanyń úshinshi kezeńin jobalaý jumysy aıaqtalyp jatyr. 2020 jyldan bastap qalǵan jol qıylystaryn jańǵyrtý kózdelip otyr, ol -118 baǵdarsham.

Aıta keteıik, bul júıe qalalyq trafıktiń problemasyn tolyǵymen sheshe almaıdy. Máseleni sheshý úshin kishi kólik aınalymynyń qurylysyn aıaqtaý kerek, ol kólik qozǵalysyn úzdiksiz qamtamasyz etýge múmkindik beredi. Máńgilik el dańǵylyna balama retinde Táýelsizdik dańǵyly qurylysynyń jalǵasyn aıaqtaý kerek. «Sol jaǵalaý tolyǵymen ıntellektýaldyq júıege qosylǵan, alaıda munda kólik kollapsy jıi bolyp turady. Birinshi kezekte tuıyq kósheler men negizgi magıstraldardy ótkizý kerek. Tipti, kópten kútken Asan qaıǵy kóshesiniń qurylysy máseleni sheshe almaıdy, óıtkeni ol tájirıbe júzinde Sh.Ýálıhanov kóshesin qaıtalap otyr. Keptelister Kravtsov kóshesinen bastalyp, Taha Hýseın kóshesine tireledi, odan J.Táshenov kóshesinen sol jaǵalaýǵa Máńgilik el dańǵylyna tireledi. Ári qaraı kólik júre almaıdy. Sol jerde keptelister bastalady», - dedi Kólik jáne jol-kólik ınfraqurylymy basqarmasynyń basshysy Nurlan Soltambekov.

Búgingi kúni Nur-Sultanda bes qurylys júrgizý aýdany men ónárkásiptik aımaq anyqtaldy, ol jerde birinshi kezekte kóshe-jol jelisi damytylatyn bolady.