Elordada 13 memlekettiń tsırk óneriniń maıtalmandary bas qosady
NUR-SULTAN. QazAqparat - Elorda kúnin merekeleý aıasynda 4-8 shilde aralyǵynda Nur-Sultanda HІІ «Azııa jańǵyryǵy» halyqaralyq tsırk óneri festıvali ótedi, dep habarlaıdy QazAqparat qala ákimdiginiń resmı saıtyna silteme jasap.
Bul sharany ótkizý ıgi dástúrge aınalǵan. Bıylǵy festıvalge Qazaqstannan bólek Ulybrıtanııa, Vetnam, Mysyr, Izraıl, Ispanııa, Qytaı, Qyrǵyzstan, Mońǵolııa, Reseı, Tájikstan, Ózbekstan, Ýkraına elderinen 60-qa jýyq artıst qatysady.
Tórtkúl dúnıeden jınalǵan tsırk óneri maıtalmandarynyń qoıylymdaryn baǵalaıtyn halyqaralyq qazylar alqasynyń quramyna tsırk ujymdarynyń jetekshileri, túrli memleketterdiń eńbek sińirgen qaıratkerleri endi.
Qazylar alqasynyń tóraǵasy - astanalyq tsırktiń dırektory, QR eńbek sińirgen artısi, «Parasat» ordeniniń kavaleri Erik Joljaqsynov. Bıylǵy festıvalde Belarýs memlekettik tsırkiniń dırektory Vladımır Shaban, Úlken Varshava tsırkiniń dırektory Erjı Kozıak, Rıga memlekettik tsırkiniń dırektory Lolıta Lıpınskaıa, professor, Erevan tsırkiniń kórkemdik jetekshisi Sos Petrosıan Iosıf, Ýkraına memlekettik tsırk kompanııasynyń dırektory Sergeı Kabakov, Italııadaǵy Halyqaralyq tsırk festıvaliniń prezıdenti Fabıo Montıko, Firebird Productions, Inc. kompanııasynyń prezıdenti Petr Dýbınskıı jáne ózgeleri qatysýshylardyń ónerin baǵalaıdy.
Elordamyzdyń mádenı ómirindegi osynaý ataýly sharany uıymdastyrýshy - astanalyq tsırk, sondaı-aq Nur-Sultan qalasynyń mádenıet jáne sport basqarmasy.
