Elordada 12 jańa mektep salynyp, 16-sy jóndeýden ótedi
NUR-SULTAN. QazAqparat - Nur-Sultan qalasynyń ákimi Altaı Kólginov birqatar bilim berý mekemelerin jóndeý barysymen tanysty, dep habarlaıdy QazAqparat.
«Bıyl 16 mektepti jóndeımiz. Qasbetin jańartý, shatyryn jóndeý, terezeler men edenderdi aýystyrý jáne taǵy basqasyn atqarý qajet. Búgin birqatar oqý oryndaryn, sonyń ishinde №3 mektep-gımnazııany jóndeý jumystarymen tanystym. Qabyrǵalarda jaryqtar paıda bolǵan. Mekteptiń irgetasy otyra bastaǵan. Sonyń saldarynan mektepke sý kiredi. Bıylǵy oqý jylynyń basynda bul máseleler sheshiledi», – dep jazdy A.Kólginov Instagram-paraqshasynda.
Onyń aıtýynsha, «Jumyspen qamtýdyń jol kartasy» baǵdarlamasy aıasynda 16 mekteptiń 13-inde kúrdeli jóndeý júrgiziledi.
Baǵdarlama boıynsha 15 myń jumys orny ashylady. Eńbekke ornalastyrý birinshi kezekte jumyspen qamtý ortalyǵy arqyly júrgiziledi.
«Sonymen qatar jańa mektepter salý boıynsha úlken jumystar atqaryp jatyrmyz. Bıyl 20 myń oqýshyǵa arnalǵan 12 mektep salamyz. Kelesi jyly 40 myń orynǵa eseptelgen sonsha mektep salynady. Oqý oryndaryn aldymen, oryn tapshylyǵy bar jerlerde salyp jatyrmyz. Mektep qurylysyna jeke ınvestıtsııalardy tartamyz», – dep atap ótti A.Kólginov.
