Elordada 11 myńnan astam sheteldik ákimshilik jaýapkershilikke tartyldy
ASTANA. QazAqparat - Elorda polıtsııasy jedel-profılaktıkalyq is-shara ótkizý barysynda kóshi-qon zańnamasyn buzýdyń 284 faktisin anyqtaǵan, dep habarlaıdy Astana qalasy ákimdiginiń medıa ortalyǵy .
Astanalyq polıtseıler qala aýmaǵynda jedel-profılaktıkalyq is-sharalar ótkizýdiń úsh kúndiginde kóshi-qon zańnamasyn buzýdyń 284 faktisin anyqtaǵan. Atap aıtqanda: Qazaqstanda bolý erejesin buzǵany úshin 251 shetel azamaty, sheteldikterdi qabyldaýshy tulǵanyń bekitilgen erejeni buzǵany úshin 27 qazaqstandyq, sheteldik jumys kúshin paıdalaný erejesin buzǵany jáne sheteldikterdiń eńbek qyzmetin zańsyz júzege asyrǵany úshin 6 jumys berýshi ákimshilik jaýapkershilikke tartylǵan.
Elden shyǵarý týraly sottyń sheshimin oryndamaǵany, atap aıtqanda QR QK 393-baby boıynsha sotqa deıingi tergep-tekserýdiń biryńǵaı tizilimine 13 qylmystyq quqyq buzýshylyq tirkelgen. Qazqastan Respýblıkasynyń kóshi-qon zańnamasyn buzǵany úshin Astana qalasynyń mamandandyrylǵan aýdanaralyq ákimshilik sotynyń sheshimimen 42 shetel azamaty elden shyǵaryldy.
118 shetel azamatyna qatysty Qazaqstan aýmaǵynda ýaqytsha bolý merzimi qysqartyldy, jeke basyn anyqtaý úshin qabyldap-taratý ornyna TMD-nyń 47 azamaty jetkizildi. Úsh kúnniń ishinde 884 910 teńge somasynda aıyppul salynyp, onyń ishinde 510 525 teńgesi óndirilgen.
Qalalyq ІІD Kóshi-qon qyzmeti basqarmasynyń bastyshysy Erketaı Tutqyshevtiń aıtýynsha, jyl basynan beri elorda aýmaǵynda kóshi-qon zańnamasyn buzǵany úshin 11 275 sheteldik jáne azamattyǵy joq tulǵa ákimshilik jaýaptylyqqa tartyldy, onyń ishinde 1 674 shetel azamaty Qazaqstannan shyǵaryldy. Kóshi-qon zańnamasyn buzǵany úshin 139 qylmystyq is qozǵaldy. Sheteldik jumys kúshin tartý tártibin buzǵany jáne sheteldikterdiń zańsyz jumys istegeni úshin 147 jumys berýshi ákimshilik jaýapqa tartyldy.
