Elordada 11 medıtsınalyq nysan salynady

ASTANA. KAZINFORM – Densaýlyq saqtaý basqarmasy aldaǵy 4 jylǵa 11 medıtsınalyq nysannyń qurylysyn josparlap otyr. 

Bul týraly basqarma basshysy Aınur Tóleýova 2025 jyldyń qorytyndysy boıynsha ótken alqa otyrysynda habarlady.

Onyń sózinshe, elordalyq medıtsınalyq uıymdarǵa aıtarlyqtaı júkteme túsip, mekemeler josparly qýattylyǵynan artyq qyzmet kórsetýde.

— Elorda halqy jyl saıyn orta eseppen 100 myń adamǵa ósip otyrǵanyna baılanysty qazirgi densaýlyq saqtaý ınfraqurylymy úlken júktemeni kóterýde. Odan bólek, árbir besinshi shaqyrtý qala emhanalaryna tirkelmegen ózge óńir turǵyndary men shetel azamattaryna tıesili ekenin de atap ótken jón, — dedi qalalyq densaýlyq saqtaý basqarmasynyń basshysy.

Memleket bekitken elordanyń Bas josparyna sáıkes, 2035 jylǵa qaraı qala halqynyń boljamdy sany 2,3 mıllıon adamǵa jetedi dep kútilýde.

Bul óz kezeginde sapaly medıtsınalyq kómekke degen suranystyń artýyna alyp keledi.

Atalǵan máseleni sheshý maqsatynda birqatar medıtsınalyq uıymdardyń qurylysy josparlanǵan. Atap aıtqanda, 2 perınataldyq ortalyq, zamanaýı kópbeıindi jańa aýrýhana, 6 jańa tolyqqandy emhana (onyń ishinde 2 memlekettik), sondaı-aq 2 jedel medıtsınalyq járdem qosalqy stantsııasy salý kózdelgen.

Sonymen qatar, osy jyldyń mamyr aıynda № 2 Kópbeıindi qalalyq aýrýhana janyndaǵy qabyldaý-dıagnostıkalyq keshenniń qurylysy aıaqtalady. Bul tek eki korpýsty biriktirý ǵana emes, iri flagmandyq medıtsınalyq ortalyq qurý.

Keshen quramynda kópfýnktsıonaldy jansaqtaý bólimi, keńeıtilgen qarqyndy terapııa palatalary, joǵary tehnologııalyq dıagnostıka jáne emdeý ádisteri qarastyrylǵan.

Eske salsaq, ótken jyly atalǵan másleni sheshý maqsatynda Nurly jol aýdanynda bir aýysymda 350 qabyldaýǵa arnalǵan jekemenshik emhana ashylǵan bolatyn. Al bıyl Ulttyq shuǵyl medıtsınany úılestirý ortalyǵy bazasynda Nura jáne Esil aýdandarynyń balalaryna qyzmet kórsetetin balalar travmatologııalyq pýnkti ashyldy.

Aıta ketelik Mańǵystaýda eldegi ekinshi biregeı jedel járdem stantsııasy ashyldy.