Elordada 11 medıtsınalyq mekeme salynady
ASTANA. KAZINFORM – Astana qalasynyń ákimi Jeńis Qasymbek Instagram paraqshasynda salynyp jatqan medıtsınalyq nysandar týraly jazdy, dep habarlaıdy elorda ákimdiginiń resmı saıty.
– Keıingi 10 jylda elordada bosaný sany 35%-ǵa artty. Sondyqtan qalalyq akýsherlik statsıonarlar shamadan tys júktememen jumys istep keledi. Osy máseleni sheshý úshin qalada árqaısysy 250 orynǵa arnalǵan eki perınataldyq ortalyq ashylady.
Alǵashqy perınataldyq ortalyq «Samuryq-Qazyna» AQ qarajaty esebinen salynady. Qazirgi ýaqytta qurylys jumysy júrip jatyr, nysandy 2027 jyly paıdalanýǵa berý josparlanǵan.
Ekinshi perınataldyq ortalyq boıynsha bıyl jobalaý jumysyn aıaqtaý, al nysandy 2028 jyly paıdalanýǵa berý josparlanyp otyr.
Jedel medıtsınalyq járdemdi damytý aıasynda jaqyn ýaqytta №2 qalalyq kópbeıindi aýrýhana janyndaǵy qabyldaý-dıagnostıkalyq kesheniniń (QDK) qurylysy aıaqtalady. Bul jedel medıtsınalyq járdemniń qoljetimdiligi men kórsetilý jyldamdyǵynyń artýyna múmkindik berip, statsıonarlyq kómektiń flagmanyna aınalady.
Sol sııaqty «Samuryq-Qazyna» UÁQ» AQ qoldaýymen Saryarqa aýdanyndaǵy №3 jańa kópbeıindi qalalyq aýrýhananyń (KQA-3) jobalaý jumysy jalǵasyp jatyr, - dedi Jeńis Qasymbek.
Óz kezeginde qala ákimi balalarǵa kórsetiletin jedel medıtsınalyq kómekke erekshe nazar aýdarylatynyn erekshe atap ótti.
– 2026 jyldyń 15 aqpanyna deıin Ulttyq shuǵyl medıtsınany úılestirý ortalyǵynyń bazasynda Nura jáne Esil aýdandary úshin balalarǵa arnalǵan travmatologııalyq pýnkt jumysyn bastaıdy. Bul oń jaǵalaýda ornalasqan qoldanystaǵy balalar travmpýnktine túsetin júktemeni edáýir azaıtyp, balalarǵa arnalǵan medıtsınalyq kómektiń qoljetimdiligin arttyrýǵa múmkindik beredi, - dep jazdy Jeńis Qasymbek.
Astana qalasynyń ákimi jalpy alǵanda, elordada densaýlyq saqtaý salasyna qatysty 11 jańa nysannyń qurylysy kózdelgenin de tilge tıek etti. Olardyń qatarynda respýblıkalyq ortalyqtar, kópsalaly aýrýhanalar, emhanalar jáne qosalqy jedel járdem stantsııalary bar ekenin aıtty.
Eske salsaq, osyǵan deıin Astana mańyna ekopark salatyn bes aýmaq usynylǵanyn jazǵan edik.