Elordada 100-den astam qumar oıyn apparattary joıyldy

Bul týraly búgin Ortalyq kommýnıkatsııalar qyzmetindegi baspasóz máslıhatynda Nur-Sultan qalalyq ekonomıkalyq tergeýler departamenti ekinshi tergeý basqarmasynyń basshysy Oljas Súleımenov aıtty, dep habarlaıdy QazAqparat tilshisi.

«Ótken jyly jedel izdestirý sharalarynyń nátıjesinde Nur-Sultan qalasy aýmaǵynda qarajatty qolma-qol aqsha aınaldyrýmen aınalysatyn 4 qylmystyq toptyń áreketi áshkere boldy. Aınalymnan shamamen 30 túrli uıymnyń mórleri tárkilendi. Memleketke kelgen shyǵyn 2 mlrd teńgeni quraıdy. Júıeli jedel sharalardyń arqasynda joǵaryda atalǵan toptardyń áreketine qatysty aıǵaqtar alyndy. Sonymen qatar tintý barysynda qylmystyq áreketterge qatysty qujattar, mórler, fleshkartalar alyndy», - dedi Oljas Súleımenov.

Sonymen qatar ol qumar oıyn oryndarynyń zańǵa qaıshy áreketterin tyıýǵa baǵyttalǵan jumystary jaıynda da aıtty.

«Ótken jyly qumar oıyn ótkizetin 25 oryn anyqtaldy. Aınalymnan 100-den astam oıyn apparattary tárkilendi. Sot sheshimimen tulǵalar jaýapqa tartyldy. Atalǵan apparattar joıyldy. Osy jyldyń ózinde mundaı 10-nan astam apparat tárkilenip otyr», - dedi basqarma basshysy.