10 sekýndta 10 qabat: Elordalyq qutqarýshylarǵa jańa órt sóndirý tehnıkasy berildi
ASTANA. KAZINFORM — Astanada órt sóndirýshilerge Túrkııada jasalǵan jańa avtosatylar berildi, dep habarlaıdy TJM baspasóz qyzmeti.
Astanada № 7 mamandandyrylǵan órt sóndirý bóliminiń bazasynda órt sóndirý qyzmetiniń bólimshelerine jańa AL-55 jáne AL-60 avtosatylaryn tabystaý rásimi ótti. Tehnıkanyń kiltterin Tótenshe jaǵdaılar mınıstri general-leıtenant Shyńǵys Árinov tabys etti.
Túrkııada qurastyrylǵan jańa avtosatylar buǵan deıin elordalyq garnızonda qoldanylmaǵan jáne tehnıkalyq sıpattamalary jaǵynan elimizde balamasy joq. TJM basshysy tehnıkalardyń Qazaqstan Respýblıkasynyń Prezıdenti Qasym-Jomart Toqaev pen jergilikti atqarýshy organdardyń qoldaýymen azamattyq qorǵaý júıesin jańǵyrtý aıasynda jetkizilip jatqanyn atap ótti.
Tehnıkany paıdalanýǵa berer aldynda elordada túrkııalyq mamandardyń qatysýymen jeke quramǵa oqytý ótkizildi. Praktıkalyq sabaqtar bólimshelerdiń bıik nysandarda jumys isteý kezinde jańa tehnıkany tıimdi qoldanýǵa daıyndyǵyn qamtamasyz etti. Bıik ǵımarattar qarqyndy salynyp jatqan megapolıs úshin mundaı tehnıkanyń mańyzy zor.
— Avtosatylar shamamen 10 sekýnd ishinde on qabatty ǵımarat deńgeıine kóterilýge múmkindik beredi, adamdardy jedel evakýatsııalaýdy jáne órt sóndirý quraldaryn jetkizýdi qamtamasyz etedi. Ol tótenshe jaǵdaılarǵa den qoıý tıimdiligin jáne turǵyndardyń órt qaýipsizdigi deńgeıin arttyrady, — delingen habarlamada.
Buǵan deıin SQO-da aýyldaǵy jańa órt sóndirý pýnkti maman joqtyǵynan jabyq turǵanyn jazǵanbyz.
