Elordada 1 qarashada Astana Bike velosıpedterin jalǵa berý aıaqtalady
NUR-SULTAN. QazAqparat - 1 qarashada Nur-Sultan qalasynda velosıpedterdi jalǵa berý maýsymy resmı túrde aıaqtalady. Jeksenbi kúni tańǵy saǵat 03:00-de stantsııalardaǵy barlyq velosıpedter buǵattalady, dep habarlaıdy QazAqparat ákimdiktiń resmı saıtyna silteme jasap.
Astana Bike velosıpedterin jalǵa berý jobasy elordada 2014 jyldan beri júzege asyrylyp keledi. Bıyl joba «CTS» kompanııasynyń basqarýyna berildi. Osy ýaqyt aralyǵynda velobike.kz resmı saıty ózgertildi, onlaın-tirkeý, onlaın toltyrý jáne tólem fýnktsııalary saıtta táýlik boıy qoljetimdi boldy. Kaspi.kz jáne QIWI arqyly tólem iske qosyldy. Monıtorıng úshin kameralar qoldanylady.
«Barlyq jańashyldyqtar qyzmet kórsetý sapasynyń aıtarlyqtaı ósýine yqpal etti. Nátıjesinde paıdalanýshylar sany úsh ese artty. Іske qosylǵan sátten bastap júıege 14,2 myńnan astam jańa tutynýshy tirkeldi, 14 myń jazylym satyp alyndy. Al velosıpedpen júrip ótken jalpy qashyqtyq 1,6 mıllıon shaqyrym. Velosıpedti paıdalanýshylardyń kópshiligi erler – 61,5%, áıelder 38,5% quraıdy», - dep túsindirdi «CTS» kompanııasynan.
Eske salaıyq, abonentterdiń balansy kelesi maýsymǵa aýystyrylady. Nemese qaldyq aqshany R. Qoshqarbaeva dańǵyly, 50/1 mekenjaıy boıynsha «CTS»-tiń ortalyq kassasynan alýǵa bolady.
