Elordada 1 700-ge jýyq aqyly kólik turaǵy joıyldy
Atap aıtqanda, Saryarqa aýdanynda 860, Almaty aýdanynda 325, Baıqońyr aýdanynda 107, Esil aýdanynda 388 aqyly turaq orny alyndy.
«Aıta ketý kerek, aqyly turaq oryndary ornalasqan ýchaskeler qala menshiginde. Joba – qalanyń kólik strategııasynyń bir bóligi, turaq oryndarynyń tapshylyǵy problemasyn sheshýge múmkindik beredi, avtomobıl trafıgin retteıdi, jaıaý júrginshilerdiń qaýipsizdik deńgeıin arttyrýǵa yqpal etedi. Jobanyń basty maqsaty – kóshelerdiń ótkizý qabiletin arttyrý jáne jol-kólik oqıǵalarynyń sanyn azaıtý», - delingen habarlamada.
«Astananyń turaq keńistigi» JShS-nen atap ótkendeı, álemdik tájirıbe turaq oryndaryn basqarýdyń tıimdi júıeleri turaq keńistikteriniń júktemesin 40-50%-ǵa tómendetetinin, jol jelisine júktemeni 20-30%-ǵa azaıtatynyn jáne eń bastysy, qalanyń problemalyq aýdandarynda jol qozǵalysy erejelerin buzý sanyn 70%-ǵa deıin qysqartatynyn dáleldedi.
«Aqyly avtoturaqtar ashylǵanǵa deıin Nur-Sultan qalasynyń ortalyq aýdandarynyń júktemesi 150-175% boldy. Jumys kúnderindegi rettelmeıtin turaqtardyń aınalymy tek 1-2 avtomobıl, ıaǵnı avtokólik áýesqoılary tegin turaq oryndaryn teris paıdalanǵanyn, kólikterin uzaq ýaqyt, keıde bir kún nemese tipti birneshe kún qaldyrǵanyn, osylaısha basqa qatysýshylar úshin qozǵalysty qıyndatqanyn kórsetedi. Búginde jaǵdaı 3-4 jyl burynǵyǵa qaraǵanda áldeqaıda jaqsy.
Bul rette turaq oryndarynyń 10%-y múgedekterdiń jáne olardy tasymaldaıtyn adamdardyń kólik quraldaryn tegin ornalastyrýǵa arnalǵan, jeńildikti sanattarǵa sáıkes kelmeıtin qalǵan barlyq azamattar úshin aqyly aımaqtarda turaq kún saıyn saǵat 20:00-den keıin, sondaı-aq demalys jáne mereke kúnderi tegin», - delingen ákimdik aqparatynda.
