Elorda jurtshylyǵy qabyrǵaly qalamger Nurǵoja Orazdy aqtyq saparǵa shyǵaryp saldy (FOTO)

«Ardaqty áleýmet, qazaq ádebıeti men mádenıeti, qazaqtyń ulttyq óneri oıda-joqta aýyr qazaǵa kez boldy. Ómirden qazaq ádebıetine óziniń boıyna bitken darynyn ólsheýsiz arnaǵan, sóz deıtin ónerdi búkil óner ataýlynyń ishinde eń qasıettisi sanaǵan, kindigin osy Arqa óńiri kesken qazaqtyń aıaýly, ardaqty perzentteriniń biri Nurǵoja Oraz ómirden ótip otyr», - dedi qoshtasý rásiminde Qazaqstan Jazýshylar odaǵynyń tóraǵasy Nurlan Orazalın.
Nurlan Orazalın óz sózinde, N.Oraz óleń deıtin órisi keń bólek dúnıede, ádebıet deıtin yrysy mol álemde óziniń adam balasynda sırek bolatyn keńdigimen, tereńdigimen, alǵyrlyǵymen el jadynda qalatynyn aıtty.
«Biz aqyndy ǵana joǵaltqan joqpyz. Biz shyn maǵynasyndaǵy qazaq deıtin halyqty jaqsy kóretin, soǵan qaltqysyz qyzmet etken azamatymyzdan aıyrylyp otyrmyz. ádebıettiń eńbek torysynan aıyrylyp otyrmyz. Halyqtyń kóshin bastaǵan jaqsy, bilgir, belgili azamatynan aıyrylyp otyrmyz», - dedi N.Orazalın.
Nurǵoja Narymbaıuly 1932 jyly 20 qazanda Qostanaı oblysy Ýrıtskıı (qazirgi Sarykól) aýdanyndaǵy Maıak keńsharynda týǵan. 1947 jyly týǵan aýylyndaǵy jetijyldyq mektepti bitirip, Gýrev (Atyraý) pedýchılışesin 1950 jyly tamamdaǵan. Munaıly jetijyldyq mektebinde bir jyl muǵalim bolǵan. 1951 jyly Qazaq memlekettik ýnıversıtetiniń fılologııa fakýltetine túsken. Alǵashqy toptamasy «Jas júrek» (1956) atty jas aqyndar jınaǵyna endi. 1956-1958 jj. mektepte ustazdyq etken. 1958-1963 jj. Qostanaı oblystyq gazetinde, 1963-1965 jj. «Tyń ólkesi» gazetinde qyzmet etti. 1965 jyly Tselınograd oblysaralyq bólimshesine jaýapty hatshy bolyp taǵaıyndalyp, keıinnen «Jańa Saryarqa» jýrnalynyń ashylýyna muryndyq boldy, basylymnyń bas redaktory bolyp qyzmet atqardy.
Qazaq poezııasynda óz úni men oryny bar aqyn Nurǵoja Oraz ádebıetimizdiń, jalpy rýhanııatymyzdyń da soltústik óńirlerdegi ilgeri-keıindi kezeńderdegi órkenine erekshe úles qosyp kele jatqan qarymdy qalamgerlerdiń biri bolatyn.
Ásirese, keshegi keńestik júıede Nurǵoja Oraz bastaǵan at tóbelindeı ǵana jergilikti aqyn, jazýshylar bul ólkedegi qazaq dili men tiliniń solǵyn tartyp, tamyrynan úzilip qalmaýyna aıtýdaı eńbekterin sińirdi.
1964 jyly jaryq kórgen «Tuńǵysh kitabynan» bastap arqaly shaıyr qolynan qalamyn bir sátke de tastamaı, oqyrmandaryna «Shuǵyla», «Kóńil kóktemi» , «Tyń túlegi», «Qyrandar uıasy» , «Jaýqazyn shaq» , «Dala demi» taǵy da basqa shyǵarmalaryn usyndy.
Toptama óleńderi ýkraın, orys, qyrǵyz tilderine aýdarylǵan.
«Qarakúıik» atty kesek romanynda qubylmaly, tolqymaly zaman ahýalyn, qazaqtyń taǵdyr talaıyn, aqıqat bolmysty shyǵarmashylyq zerdelilikpen shynaıy sıpattady.
Uly Ǵabıt Músirepovtiń, Ábdildá Tájibaevtyń, Ǵafý Qaıyrbekovtiń, Saǵı Jıenbaevtyń jaqyn dostary sapynda bolǵan jazýshynyń aıtary da, tolǵary da ushan-teńiz bolatyn.
Nurǵoja Oraz Qazaqstan Respýblıkasynyń eńbek sińirgen mádenıet qyzmetkeri, QR Jýrnalıster odaǵynyń M.Seralın atyndaǵy syılyǵynyń laýreaty, «Astana» jáne «Táýelsizdiktiń 10 jyldyǵy» medaldarymen marapattalǵan. «Qazaqstannyń eńbek sińirgen qaıratkeri» (2006).