«Elorda juldyzy» syılyǵynyń ıegerleri marapattaldy
ASTANA. QazAqparat - Astana kontsert zalynda elordanyń Arqa tósine qonys aýdarǵanyna 21 jyl tolýyna oraı bir top astanalyq ujym marapattaldy, dep habarlaıdy QazAqparat tilshisi.
Aıta ketsek, 1997 jyly 10 jeltoqsanda QR Prezıdenti Nursultan Nazarbaevtyń Jarlyǵymen elorda Almaty qalasynan Aqmola qalasyna resmı túrde kóshirildi.
Osy ataýly kúnge oraı, bıyl «Elorda juldyzy» syılyǵy alǵash ret uıymdastyryldy. Búgin elimizdiń bas qalasynyń damýyna zor úles qosqan elordalyq ujymdar men uıymdar atalǵan syılyqpen marapattaldy. Endi bul syılyq dástúrli túrde tabystalyp turmaq.
Sharanyń shymyldyǵy «Astana BALLET» teatrynyń horeografııalyq qoıylymymen ashyldy. 20 jyldyń qorytyndysy boıynsha birinshi marapat osy ujymǵa tabystaldy. 2012 jyly Elbasynyń bastamasymen negizi qalanǵan teatr sahnasynda tórt jyldyń ishinde 10 balet qoıylymy men 4 kontserttik baǵdarlama qoıyldy.
Odan ári keshti ánshi Dınaıa men «Astana Opera» ujymy jalǵastyrdy.
«Astana Opera» memlekettik opera jáne balet teatry da «Elorda juldyzy» syılyǵynyń laýreaty atandy. Qazirgi tańda teatr elimizden tys jerlerde de keńinen tanymal. Onyń árbir premerasy anshlagpen ótedi.
«EKSPO-2017» mamandandyrylǵan halyqaralyq kórmesi de syılyq ıegeri atandy. Byltyr jazda ótken kórmege 100-den asa memleket qatysty. 3 aıdyń ishinde kórmeni 178 elden 4 mıllıonnan asa týrıst tamashalaǵan, onyń ishinde 20 memleket jáne úkimet basshysy bar. «Astana Ekspo-2017» UK basshylyǵyna «Elorda juldyzyn» Astana ákimi Baqyt Sultanov tabystady.
«Barshańyzdy búgingi erekshe tarıhı kúnmen shyn júrekten quttyqtaımyn. Astananyń 20 jyldyǵyn toılaýdyń alǵashqy sharasy bir jyl buryn osy jerden bastaý alǵan, búgin mine sonyń qorytyndysyn jasaýdamyz. Elbasynyń 21 jyl buryn qabyldaǵan tarıhı sheshimi, qazirde óziniń tarıhı mańyzdylyǵyn kórsetti. Oǵan dálel shaǵyn ǵana oblys ortalyǵynyń álem tanyǵan ásem qala - Astanaǵa aınalýy», - dedi Astana qalasynyń ákimi Baqyt Sultanov.
Joǵary bilim berý salasy boıynsha ataýly syılyq tek Astananyń ǵana emes, tutastaı Qazaqstannyń ulttyq brendine aınalǵan Nazarbaev Ýnıversıtetine tabys etildi. 2010 jyly stýdentterge esigin aıqara ashqan bilim ordasy búginde ózindik ǵylymı bazasy bar elimizdiń jetekshi joǵary oqý oryndarynyń biri. «Elorda juldyzy» syılyǵyn ýnıversıtet basshylyǵyna QR Bilim jáne ǵylym mınıstri Erlan Saǵadıev tabystady.
Medıtsına salasy da nazardan tys qalǵan joq. Zamanaýı medıtsınalyq kómek alý úshin óńirlerden elordaǵa emdelýge keletin patsıentter úlesi ótken jyly 60%-ǵa jýyqty qurady, odan bólek, búginde bas qalada 20 myńǵa jýyq kúrdeli jáne biregeı ota jasalǵan. Elordanyń ǵana emes otandyq medıtsınanyń damýyna úles qosqany úshin Astanadaǵy Ulttyq neırohýrırgııa jáne ulttyq kardıohırýrgııa ortalyqtary «Elorda juzdyzdary» marapatyna ıe boldy.
Munymen qosa, Astana - sporttyq qala. Onyń ishinde Qazaqstannyń bes dúrkin chempıony, ÝEFA Chempıondar lıgasynyń týrnırinde el namysyn qorǵaıtyn jalǵyz komanda - «Astana» fýtbol klýby. Sondaı-aq, «Barys» hokkeı klýby da álem birinshilikterinde elordanyń atynan laıyqty óner kórsetýde. Jáne de «Astana» velokomandasyn da atap ótken jón. Bul atalǵan 3 sporttyq uıymda aıtýly syılyqqa ıe boldy.
«Elorda juldyzy» laýreattarynyń biri «Jastar» teatry. Atalmysh mekemeniń alǵashqy «Shyńǵysqan» atty qoıylymy 2007 jyly kórermenge jol tartqan bolatyn. Sodan beri teatr óz kórermenderin jarqyn jańa qoıylymdarymen qýantyp keledi, al ártisteri bedeldi respýblıkalyq jáne halyqaralyq teatr festıvalderinde qurmetti marapattar ıelenýde. Erekshe aıtyp ótken jón búgingi kesh barysynda «Jastar» teatry «Uly dalanyń jeti qyry» atty jańa qoıylymdy sahnalady.
Sonymen qatar, otandyq ázil klýbtardyń ishinen alǵash ret Máskeýde Kóńildi tapqyrlar klýbynyń joǵary lıgasynyń chempıony atanǵany úshin «Sparta-Nomad Astana» KTA komandasy «Elorda juldyzy» syılyǵymen marapattaldy.
Kesh barysynda Qaırat Baekenov, Alen Samyken, aǵaıyndy Júgúnisovter, Sara Isak, Aınur Ábdıeva jáne taǵy basqa estrada juldyzdary óz ónerlerin kórsetti.
