Elorda Jeńis kúnin toılap jatyr
Uly Jeńistiń 65 jyldyǵyna oraılastyrylǵan merekelik sharalar «Qazaq eli» monýmenti alańynan bastalyp Táýelsizdik dańǵyly arqyly «Otan qorǵaýshylar» monýmentine baratyn azamattyq sherýge ulasty. «Otan qorǵaýshylar» monýmentiniń janynda shatyrly qalashyq ornatylyp, dástúrli botqa daıyndalýda. Osy jerde sahnada úrmeli orkestr men án jáne bı ansamblderiniń kontserti bolady. Osyndaı merekelik kontsertter eski qalalyq alańda, Jastar saraıynyń janyndaǵy jazǵy alańda, «Báıterek» monýmentiniń aldynda jáne elordalyq saıabaqta ótedi.
Kúndiz saǵat 16.00-da qalalyq ákimdiktiń aldyndaǵy alańda búgingi meıramǵa arnalǵan Patrıottyq ánder festıvali ótedi. Oǵan kásipqoı jáne kórkemónerpaz ujymdary, kúsh-qýat jáne qorǵanys vedomstvolarynyń úrmeli aspaptar orkestri qatysady. Bul sharany uıymdastyrýshy -Astana ákimdiginiń aqparaty boıynsha, festıval baǵdarlamasynda soǵys jyldarynyń ǵana emes, odan keıingi jyldary da shyqqan jaýyngerlik ánder shyrqalady.
Saǵat 17.00-de Kongress-holda elordalyqtar men qala qonaqtaryn tosyn syılyq kútedi. Onda KSRO halyq ártisi Álibek Dinishevtiń Jeńis kúnine arnalǵan jeke kontserti ótedi.
Al keshki saǵat 22.00-de Esil jaǵalaýynda merekelik otshashý bolady.
