Elorda jataqhanasyndaǵy órt neden shyǵýy múmkin - mamandar boljamy
NUR-SULTAN. QazAqparat - Elordadaǵy jataqhanadaǵy órtke elektr quralynyń qysqa tuıyqtalýy sebep bolýy múmkin. Bul týraly búgin Nur-Sultan qalalyq TJD azamattyq qorǵanys polkovnıgi Oral Ábdirahmanov aıtty, dep habarlaıdy QazAqparat tilshisi.
«Saǵat 10-39-da 101 pýltine J.Dosmuhameduly kóshesi 4 mekenjaıynan órt shyqqany týraly dabyl tústi. Órt sóndirý bólimsheleri kelgen soń 5 qabatty jataqhananyń 2-shi qabatyndaǵy bólme janyp jatqany anyqtaldy. Birinshi kezekte órt sóndirýshiler jataqhana turǵyndaryn qaýipsiz jerge shyǵardy», - dedi ol.
Onyń aıtýynsha, órt kezinde 32 adam, onyń ishinde 28 bala qutqaryldy. Munan bólek jataqhananyń 350 turǵyny óz betterinshe qaýipsiz jerge shyǵyp úlgergen.
«Órt saldarynan aýmaǵy 20 sharshy metr bolatyn bólme búlinip, úı múlki janǵan. Oqıǵa ornynda órt synaǵy zerthanasynyń mamandary jumys istep jatyr. Aldyn ala boljam - turmystyq jáne elektr quraldarynyń qysqa tuıyqtalýy. Bul negizgi nusqalardyń biri bolǵanymen basqa da sebepteri qarastyrylyp jatyr», - dedi ol.
Buǵan deıin habarlaǵanymyzdaı, búgin qaladaǵy J.Dosmuhameduly kóshesi, 4 mekenjaıynda ornalasqan jataqhanadan órt shyqty.
Belgili bolǵandaı, jataqhananyń 2-qabatyndaǵy aýmaǵy 18 sharshy metrlik bólme órtke oranǵan. Órt sóndirý qyzmeti tilsiz jaýdy ýshyqtyrmaı, jedel sóndirdi. Sondaı-aq, oqıǵa ornynan 32 adam evakýatsııalandy. Órt kezinde kishkentaı bala gazdan ýlanyp, ortasha deńgeıli jaraqatpen qalalyq aýrýhanaǵa jetkizildi.
Oqıǵa ornyna qala ákimi Baqyt Sultanov baryp, Baıqońyr aýdandyq ákimdigi basshylaryna órtten zardap shekken jandarǵa jan-jaqty kómek kórsetýdi tapsyrdy.
Órtten zardap shekken 8 bala aýrýhanada jatyr.
