Elorda jastaryna jumysqa ornalasý jóninde aqyl-keńes berildi
ASTANA. QazAqparat - Astana qalasynda jergilikti atqarýshy organdary ókilderiniń qatysýymen qala jastaryna jumysqa ornalasý boıynsha konsýltatsııalyq kómek kórsetildi, dep habarlaıdy QazAqparat tilshisi.
Sharaǵa Astana qalalyq qoǵamdyq densaýlyq saqtaý basqarmasy, «Azamattarǵa arnalǵan úkimet» memlekettik korporatsııasy, Jumyspen qamtý ortalyǵy, Medıatsııany damytý ortalyǵy jáne Turǵyn úı qurylys jınaq bankiniń ókilderi qatysty. Sonymen qatar, kásibı zańger men psıholog mamandar jastarǵa tegin konsýltatsııa júrgizdi.
Qaladaǵy «Azııa park» oıyn-saýyq ortalyǵynda ótken ashyq esik kúninde jastarǵa ózin qyzyqtyrǵan saýaldaryna jaýap alý múmkindigi qarastyrylǵan.
«Jastarǵa arnalǵan bul shara ústimizdegi jyldyń qyrkúıek aıynda bastaldy. 3 aıdan astam ýaqyta boıy Astana bazarlarynda jastardy jumysqa ornalasý jáne áleýmettik qoldaý kórsetýge baǵyttalǵan birneshe kezdesý ótti. Maqsaty - elorda jastaryn memlekettik baǵdarlamalarmen tanystyryp, onyń múmkindigin paıdalanýdy usyný. ıAǵnı bul jerde jumysqa ornalasý suraqtary boıynsha ǵana emes, odan bólek turǵyn úı alý, óz kásibin ashý, Úkimet tarapynan kórsetiletin áleýmettik qoldaýlar týraly da bile alady», - dedi «Astana jastary» memlekettik mekemesiniń basshysy Úkibaı Nurpeıisov. 
Onyń aıtýynsha, Astanaǵa óńirlerden kelgen jastar deniniń qalalyq tirkeýi joq, sondyqtan da turaqty jumys tabý múmkindikteri shekteýli.
Jastarǵa keńes berý naýqany jyl sońyna deıin óz jalǵasyn tabady, atap aıtqanda erteń «Áziret sultan» meshitinde ótedi.
Aıta ketsek, Astana qalasy ákimdiginiń «Astana jastary» mekemesi uıymdastyrǵan bul shara «Jumyspen qamtý jáne áleýmettik baǵdarlama jol kartasyn» júzege asyrý aıasynda júrgizilýde.
