Elorda jastaryna 2,5 paıyzben 5 mln teńgege deıin shaǵyn nesıe beriledi

ASTANA. QazAqparat – Elordada bıznes ıdeıalardy iske asyrýǵa beriletin óteýsiz grantqa ótinim qabyldaý bastaldy. Bul týraly Astana qalasy jumyspen qamtý jáne áleýmettik qorǵaý basqarmasy basshysynyń orynbasary Erlan Júsipov málim etti, dep habarlaıdy QazAqparat tilshisi.

«Bıylǵy jańashyldyqtardyń biri – jastar úshin 2,5 paıyzben 5 mln teńgege deıin shaǵyn nesıe berý kózdelgen. Sonymen qatar, kásiptik biliktilikti arttyrý maqsatynda bir rettik vaýcherler qyzmeti usynylady. 20 aqpannan bıznes ıdeıalardy iske asyrýǵa óteýsiz granttardy alýǵa ótinimder qabyldaý bastaldy», - dedi Erlan Júsipov Astana qalasy kommýnıkatsııalar qyzmeti alańynda ótken baspasóz máslıhatynda.

Bıznes ıdeıalar grantyna ótinim business.enbek.kz saıtynda onlaın qabyldanady.

«Bıyl áleýmettik turǵydan osal topqa jatatyn 132 adamǵa grant bólý josparlanyp otyr. Granttar ózindik bıznes ıdeıasy bar ataýly áleýmettik kómek alýshylarǵa, kóp balaly otbasylar jáne memleketten járdemaqy alýshylar, sol sııaqty asyraýshysynan aırylýyna baılanysty áleýmettik járdemaqy alýshylarǵa beriledi. Sonymen qatar, granttardy bólý «qandas» mártebesi bar tulǵalarǵa, eńbekke jaramdy múgedek jandarǵa jáne múgedek bala tárbıelep otyrǵan azamattarǵa qarastyrylǵan», - deıdi spıker.