Elorda jastary saıası qýǵyn-súrgin qurbandaryn eske aldy
ASTANA. QazAqparat - Búgin Astana qalalyq jastar saıasaty máseleleri basqarmasynyń uıymdastyrýymen S.Seıfýllın eskertkishi aldynda «Estelik eskirmeıdi» atty jastar aktsııasy ótti. Bul shara saıası qýǵyn-súrgin qurbandaryn eske alý kúnine oraı uıymdastyryldy.
«Bul kúnniń elimiz, onyń ishinde jastar úshin mańyzy zor. Óıtkeni jastar barynsha ıntellektýaldy jetilgen, bilimdi, belsendi bolsa da, óz tarıhyn bilmeı elimizdiń damýyna óz úlesin qosa almaıdy. Sondyqtan da elimizdiń ótken tarıhyn bilý - bizdiń azamattyq mindetimiz. Biz tarıhymyzdy bilý arqyly bolashaqqa nyq qadam jasaı alamyz», - dedi Eýrazııa ulttyq ýnıversıtetiniń stýdenti Yqylas Jetker.
Shara barysynda jastar tarapynan ázirlengen ádebı-teatrlandyrylǵan qoıylym uıymdastyrylyp, S.Seıfýllın eskertkishine gúl shoqtaryn qoıý rásimi ótti. Sonymen qatar sharaǵa qatysýshylar jazyqsyz qurban bolǵandardy eske alý qurmetine oraı S.Seıfýllın, І.Jansúgirov, B.Maılın, M.Jumabaevtardyń shyǵarmalaryn oqyp, S.Seıfýllın atyndaǵy memlekettik murajaıǵa saıahat uıymdastyryldy.
