Elorda jastary ózderiniń materıaldyq jaǵdaılaryna kóńilderi tolady jáne dinı, etnıkalyq qaıshylyqtardy qoldamaıdy - Zertteý qorytyndysy

ASTANA. Jeltoqsannyń 9-y. QazAqparat /Jasulan Amanbaıuly/ -   «Etno-saıası jáne gýmanıtarlyq zertteýler ortalyǵynyń» júrgizgen zertteýleri elordalyq jastardyń dinı, etnıkalyq qaıshylyqtardy qoldamaıtyndyqtaryn kórsetti. Búgin Astanadaǵy Ulttyq kitaphanada ótken dóńgelek ústel otyrysy barysynda ortalyq júrgizgen saýalnamanyń qorytyndylary jarııalandy,

 dep habarlaıdy QazAqparat.     

Saýalnama qalalyq Іshki saıasat basqarmasynyń tapsyrysymen qyrkúıek aıynda ótkizilip, onda jastardyń jalpy portretin anyqtaýǵa baǵyttalǵan saýaldar jasaldy. Astana turǵyndarynyń tórtten birin 18-29 jas aralyǵyndaǵy azamattar, ıaǵnı jastar quraıdy. Saýalnama maqsaty dinaralyq jáne ultaralyq faktorlar jastardyń qoǵamdyq ómirinde qandaı ról men mańyz atqaratyndyǵyn saralaý boldy. Suraýsalynǵan 660-qa tarta 18 ben 29 jas shamasyndaǵy Astana jastarynyń 83,4 paıyzy eldegi ulttyq jáne dinı qarym-qatynas ahýalyn oń baǵalaıdy. Tek 15 paıyzy ǵana ahýal nashar ekendigin kórsetken. Bul elordalyq jastardyń etnıkaaralyq qarym-qatynastar harakteriniń jaǵymdy ekendigin kórsetedi.

Sonymen qatar, saýalnama tanystyrylymynda zertteý ortalyǵynyń sarapshysy Lıýdmıla Kýtsık, elorda jastarynyń basym bóligi (78 paıyzy) ózderiniń materıaldyq jaǵdaıy men jetken jetistikterine kóńiltoqtyq bildirgen. Óz jetistikterine kóńili tolmaıtyndar 19 paıyzdy quraǵan. Jastardyń 50 paıyzy ómir súrý kórsetkishiniń orta deńgeıine ıe ekendikterin aıtqan. Al 32,2 paıyzy otbasylyq kiristerdiń orta deńgeıinen kóp paıda tabatyndyqtaryn málim etken.

«Jalpy Astanadaǵy etnıkaaralyq jáne konfessııaaralyq qarym-qatynastyń damý dınamıkasy jaǵymdy qalyptasyp keledi. Jastar arasynda ulttyq nemese dinı kemsitýshilik tán emes jáne ol bilimi óte tómen biren-saran jeke azamattarda ǵana kórinis taýyp otyr», deıdi L.Kýtsık.