«Elorda jastary»: astanalyq jastar baǵdarlama boıynsha baspanaly bolyp jatyr
ASTANA. KAZINFORM – Astanalyq jastarǵa tıimdi sharttarmen baspanaly bolýǵa kómektesetin «Elorda jastary» turǵyn úı baǵdarlamasy belsendi túrde júzege asyrylyp jatyr, dep habarlaıdy qala ákimdiginiń resmı saıty.
Energetıka salasynda 2014 jyldan beri jumys isteıtin elordalyq turǵyn Saıan Shákenov otbasynyń qalaı baspanaly bolǵanyn aıtyp berdi. Ol 2019 jyly otbasymen satyp alý quqyǵynsyz jalǵa beriletin turǵyn úı baǵdarlamasyna qatysyp, berilgen páterde bes jyl turǵan.
– Ol kezde jańadan sábıli bolyp edik, páter jaldap júrdik. Suranysqa ıe 100 mamandyqtyń tiziminde bolǵandyqtan, baǵdarlamaǵa qatysyp kórmek boldym. Barlyǵy onlaın rejımde boldy – qujattardy qashyqtan tapsyryp, irikteýden óttik. Osylaısha bes jyl jaldamaly baspanada turdyq. Osy ýaqyt ishinde biraz aqsha jınap aldyq, - deıdi Saıan Shákenov.
2024 jyly otbasy «Elorda jastary» baǵdarlamasyna qatysýǵa ótinish berip, maquldandy. Saıannyń turaqty jalaqysy, jaqsy nesıe tarıhy jáne zeınetaqy jınaqtary irikteýden alǵashqylardyń biri bolyp ótýine múmkindik berdi.
– Qarajatymnyń bir bóligin «Otbasy bankke» aýdardym, oǵan qosa óz jınaǵym da boldy. Osynyń bári bizge ıpoteka alýǵa kómektesti. Baǵdarlamanyń arqasynda óz páterimizdi aldyq. Jas otbasy úshin eń ózekti máselelerdiń biri – páter satyp alý. Osy qıyndyqty sheshý úshin memleket jastarǵa keremet múmkindik berip jatqanyna óte qýanyshtymyz, - dedi ol.
Osy rette aıta keteıik, «Elorda jastary» baǵdarlamasy boıynsha jastarǵa jyldyq 5 paıyzben jeńildetilgen nesıe berilip jatyr.
Nesıeniń maksımaldy somasy – 20 mln teńgege deıin, bastapqy jarna – 10%, nesıe merzimi – 19 jylǵa deıin.
Baǵdarlamaǵa qatysýshylar baspanany jańadan nemese jyljymaıtyn múlik naryǵynan satyp ala alady.
2023 jyldyń naýryz aıynan bastap qatysýdyń jas shegi 34 jasqa deıin ulǵaıtyldy, bul baǵdarlamaǵa kóbirek jas mamandardyń qatysýyna múmkindik berdi.
2024 jyldyń basynan beri jalǵa alý sharttary jaramdy 778 jas astanalyq nesıeleý rásiminen ótýge jiberildi. Sáýir aıynyń basynda olardyń 370-i tólem qabilettiligin rastasa, 200 qatysýshy baspana ıesi atandy.