Elorda jańa jylda ertegi shaharǵa aınaldy
ASTANA. QazAqparat - Astana mereke qarsańynda qulpyra tústi. Jańa jyl aldynda qala myńdaǵan túrli-tústi túngi sham sáýlesine bólendi, erekshe ınstallıatsııa jáne jarqyraǵan muz músinder paıda bolyp, elorda kelbeti árlene tústi, dep habarlaıdy QazAqparat qala ákimdiginiń saıtyna silteme jasap.
Sizderdiń nazarlaryńyzǵa qysqy ertegi qalanyń fotorepartajyn usynamyz. Qala kósheleri men saıabaqtary aq qarǵa oranǵaly qala turǵyndary men qonaqtary elordanyń qysqy ertegisine ene alady.
Ortalyq kóshelerindiń baǵanalarynda aqshaqar jáne oıý-órnek túrindegi ıllıýmınatsııalar ornatyldy, jol aıryqtar men jaıaý júrginshiler joldary jarqyn fıgýralar túrindegi qarly sharlar, avtokólikter, jańajyldyq oıynshyqtarmen áshekeılendi.
Qalalyq alań, Botanıkalyq baq aýmaǵy, EXPO-2017, «Jetisý» saıabaǵy, «Han Shatyr» SOO aýmaǵy, Prezıdent saıabaǵy, «Qazaq Eli» monýmenti alańy, «Atatúrik» saıabaǵy, Esil ózeniniń jaǵalaýy, «Jeruıyq» saıabaǵy, Aqbulaq ózeniniń jaǵasy, «Alataý» SK aýmaǵy túrli dekoratsııamen árlengen.
Alaıda, qala turǵyndary men qonaqtarynyń eń súıikti demalý oryndary bolyp Esil ózeniniń jaǵasy, syrǵanaqtar men muz aıdyndary qala bermek. Munda kishkentaı qonaqtar men eresekterdi túrli-tústi jaryqpen kómkerilgen muzdan jasalǵan músinder, tıýbıngti jalǵa alyp syrǵanaýǵa arnalǵan kishkentaı jáne úlken tóbeshikter qarsy alady.
Eresekter úshin uıymdastyrýshylar jalǵa beriletin konkılerdi, shańǵylar men hokkeı taıaqtaryn usynýda. Qalanyń kóptegen aýdandarynda jańadyldyq shyrshalar ornatylǵan. Árqaısysy bir-birinen ásemdigimen erekshelenedi.
Keler jyldy bildiretin kólemdi sandar dástúrli áshekeıler boldy. Olardy jarqyraǵan dálizderden, postamentterden, qalamyzdyń kórikti jerlerinen kórýge bolady.
Aıta keteıik, Astanada #AstanaWinterland atty qysqy ertegi jobasy bastaý alǵan bolatyn. Onyń aıasynda:12 taqyryptyq alań, 32 muz aıdyny, 36 muz tóbeshik uıymdastyrylyp, 400-den astam is-shara ótedi.
Qalada túrli-tústi shamdar qosýly, aıaq astynda qar syqyrlap, japalaqtap jaýǵan qardy qolǵa qondyrǵyńyz keledi. Jańa jyl qarsańyndaǵy ertegi ýaqyty bastalǵan bolýy kerek. Merekeni seziný úshin qala kóshelerine shyǵyp, alańdarǵa baryp, muz aıdyndarynda, syrǵanaqtarda balalyq shaqty eske alyp, oınańyz.
