Elorda vokzalynda nege adam tolyp júr
NUR-SULTAN. QazAqparat – «Qazaqstan temir joly» ulttyq kompanııasy áleýmettik jelidegi málimetke túsinikteme berdi. Onda elorda vokzalynda qaraqurym halyq jınalǵany kórinis tapqan bolatyn, dep habarlaıdy QazAqparat tilshisi.
«Astana-Chto? Gde? Kogda?» Telegram kanalynda elorda vokzalyndaǵy qalyń adamnyń shoǵyry týraly málimet taraǵan bolatyn.
«Nur-Sultan vokzalynda ne bolyp jatqanyn qarańyzdar. Barlyq poıyzdar keshigip jatyr. Al jóneltýdiń naqty ýaqyty men sebepteri anyqtamada aıtylmaǵan. Pandemııaǵa qaramastan, vokzalda adamdar tolyp júr. Poıyzdardyń bári úlken kidirispen kelip, attanyp jatyr», - dep jazylǵan jelide taraǵan aqparatta.
«Qazaqstan temir joly» ulttyq kompanııasynyń BAQ-pen jumys departamentiniń dırektory Qaısar Jumabaıuly atalmysh málimettiń mán-jaıyn túsindirdi.
«Temirjol jelisinde jóndeý jumystary júrgizilgen bolatyn. Qazir ol jumystar aıaqtaldy. Qozǵalys qalypty qarqynǵa tústi. Adam shoǵyry da seıildi», - dedi QTJ ókili.
