Elorda «Venetsııaǵa» aınaldy
ASTANA. KAZINFORM – Eki kún qatarynan tolassyz jaýǵan jaýynnan keıin Astana kósheleri sý astynda qaldy. Jergilikti turǵyndar áleýmettik jelilerde qalanyń drenaj júıesine narazy ekenin jarysa jazyp jatyr.
Jaýyn saldarynan keptelis bolyp, kólik ıeleri dittegen jerine keshigip jetýde. Aıaldamada qoǵamdyq kólik kútken jolaýshylardyń qarasy qalyń. Tipti, jaıaý júrginshiler jolaǵynyń ózi kólshikke aınalyp otyr. «Aryq salmaı ma?» degen turǵyndardyń shahar bıligine degen ókpesi qara qazandaı.
Qolaısyz aýa raıyna baılanysty avıakompanııalar jolaýshylarǵa reıster keshiktirilýi múmkin ekenin eskertti.
Astanalyqtar áleýmettik jelilerge jaýyn saldarynan tap bolǵan qıyndyqtaryn aıtyp, túrli fotosýretter men beınejazbalardy júktep jatyr.
Sınoptıkter mundaı aýa raıy aptanyń sońyna deıin saqtalatynyn boljap otyr.
Aıta keteıik, keshe, 8 tamyzda Astanaǵa burshaq jaýyp, áýejaıdaǵy tórt ushaqty zaqymdaǵan bolatyn.
