Elorda ustazdary bıik talaptarǵa saı bolýy tıis – Altaı Kólginov
NUR-SULTAN. QazAqparat – Elordadaǵy «Qazaqstan» ortalyq kontsert zalynda muǵalimder kúnine arnalǵan «Qaldyrǵan iziń mángilik» atty merekelik shara ótti, dep habarlaıdy QazAqparat tilshisi.
«Sizderdiń qajyrly eńbekterińiz ben árbir oqýshyǵa erekshe yqylasyńyzdyń arqasynda elimizdiń zııatkerlik áleýeti qalyptasýda. Elbasy tapsyrmasyna sáıkes elimizde alǵash ret pedagog mártebesi týraly zań daıyndalyp jatyr. Ustazdar eńbeginiń ádil baǵalanýy resmı qujatpen retteledi. Memleket basshynyń bıylǵy tamyz keńesine qatysýy men óz joldaýynda ustaz mártebesi týraly sóz qozǵaýy bilim berý salasyna kóńil bólinip jatqanyn kórsetedi. Elorda ustazdary joǵary talaptarǵa saı bolýy tıis. Bas qalamyzdy Tselınograd kezimen salystyrsaq, ustazdar sany 5 ese artqan. Búginde elordada 0-15 jas aralyǵyndaǵy 295 myń bala bar. Olardyń bilimi men tárbıesi - sizderdiń eren eńbekterińizdiń jemisi», - dedi Nur-Sultan qalasynyń ákimi Altaı Kólginov.
Aıtýly sharada 3 muǵalim - Y. Altynsarın atyndaǵy tósbelgimen, 8 muǵalim - qala ákiminiń alǵys hatymen jáne astanalyq 3 ustaz - QR bilim berý isiniń qurmetti qyzmetkeri tósbelgisimen marapattaldy.
«Orta bilim berý salasynda 20 jyldan astam eńbek etip kelemin. Ustazdyq joldy №18 mektepte bastadym, sodan osy mekteptemin. Ustazdyq etýge eshkim kezdeısoq kelmeıdi, sebebi bul salanyń jaýapkershiligi zor. Onyń ústine qala ákimi aıtqandaı, elordalyq muǵalimder barsha el ustazdaryna úlgi bolýy kerek. Buny maqtaý emes, jaýapkershilik dep qabyldaımyz. Árıne, ár ustaz marapat pen qurmetke laıyq, degenmen ustazdyń da ustazy bar, olardyń eńbegi baǵalanýy tıis. Búgingi marapatty 20 jyldyq eńbegimniń elengeni ǵana emes, aldaǵy ýaqytta budan da joǵary jetistikke jetýdiń belgisi dep bilemin», - dedi qalalyq №18 mektebiniń qazaq tili jáne ádebıeti pániniń muǵalimi, QR bilim berý isiniń qurmetti qyzmetkeri tósbelgisimen marapattalǵan ustaz Qýanysh Qalasova.
Aıta keteıik, bıylǵy ustazdar kúni sharasynyń ereksheligi - ol sabaq retinde ótti. ıAǵnı kórermender bir sátke ózderin mektep partasynda otyrǵandaı sezinip, mektep pánderin eske túsirdi.
Merekelik kesh estrada juldyzdary Qaraqat Ábildına, Aıgúl Imanbaeva, Móldir Áýelbekova, Medet Salyqov pen Klara Tólenbaeva, Rınat Maltsagov jáne astanalyq jas ónerpazdardyń qatysýymen ótken kontserttik baǵdarlamaǵa ulasty.
