Elorda turǵynynyń aqshasyn tartyp alǵan «jalǵan polıtseıler» ustaldy
ASTANA. 3 qarasha. QazAqparat /Rýslan Ǵabbasov/ - Ózderin polıtsııa qyzmetkeri retinde tanystyryp, astanalyq turǵynnyń aqshasyn tartyp alǵan eki stýdent ustaldy. Bul týraly búgin aptalyq brıfıngte ІІM Til saıasaty jáne aqparat departamentiniń bastyǵy Qýanyshbek Jumanov málim etti.
Onyń sózine qaraǵanda, Astanada eki jas jigit aldaý arqyly qala turǵynynyń 50 myń teńge aqshasyn ıemdenip ketken.
«Bul oqıǵa keshki saǵat 23.00-de oryn alǵan. Alaıaqtar ózderin polıtsııa qyzmetkerleri retinde tanystyryp, qyzmettik kýálikke uqsaıtyn qujatty kórsetken. Sodan keıin «jalǵan polıtseıler» onyń qaltalaryn tekserip, bar aqshasyn tartyp alǵan. Sondaı-aq oǵan aqshasyn qaıtaryp alý úshin polıtsııa bólimine kelýdi usynǵan»,-dedi Q. Jumanov.
Alaıda, birshama ýaqyttan keıin jábirlenýshi óziniń aldanyp qalǵanyn túsinip, polıtsııaǵa habarlaǵan. Polıtsııa jasaqshalary arnaıy orta oqý oryndarynyń biriniń eki stýdentin ustady. «Qazirgi ýaqytta osy fakt boıynsha qylmystyq is qozǵaldy. Ustalǵandardyń osyǵan uqsas basqa da qylmystarǵa qatysy bary tekserilýde»,-dedi departament bastyǵy.
