Elorda turǵynynan 40 mln teńgeniń sıntetıkalyq esirtkisi alyndy

NUR-SULTAN. QazAqparat – Elorda polıtseıleri «dızaınerlik» esirtkini saýdalaýda kúdikti tanylǵan er adamdy ustady, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.

Elorda aýmaǵynda sıntetıkalyq esirtkini jetkizý arnasynyń jolyn kesý maqsatynda qalalyq polıtsııa departamentiniń qyzmetkerleri jedel-izdeý sharalaryn ótkizdi.

Osylaısha, polıtseıler arnaıy is-shara barysynda asa iri kólemdegi «dızaınerlik» esirtkini saýdalaýda kúdikti dep tanylǵan 32 jastaǵy er adamdy ustady.

Tekserý kezinde odan 800 gramǵa jýyq «sıntetıka» tabyldy.

Er adam qoldan jasalǵan esirtkini elimizdiń Temirtaý, Atyraý jáne Pavlodar sııaqty basqa óńirlerine joldamaq bolǵan.

Budan bólek, onyń turatyn jerinen ishinde salmaǵy 850 gramnan asatyn qatty áser etetin, quramynda «A-PVP» psıhotropty zaty bar jeti túıinshek tabyldy.

Ol esirtkiniń salmaǵy - bir jarym keli nemese «sıntetıkanyń» 5 myńnan astam dozasy.

Olardyń «qara bazardaǵy» baǵasy bólshek saýdada aqshalaı sanaǵanda 40 mln astam teńgeni quraıtyn edi.

Atalǵan fakti boıynsha QR Qylmystyq kodeksiniń 297-babynyń 3-bólimimen qylmystyq is qozǵaldy.

Ustalǵan er adam Nur-Sultan qalasy polıtsııa departamentiniń ýaqytsha oqshaýlaǵyshyna qamaldy. Tergeý amaldary júrgizilýde.

Qylmystyq isti tergeý aıasynda elordaǵa esirtki jetkizýge qatysy bar qylmystyq toptyń ózge qatysýshylaryn anyqtaý úshin jedel-izdestirý sharalary júrip jatyr.